මෑතකදී ඇමරිකා එක්සත් ජනපදය විසින් චීන භාණ්ඩ සඳහා හඳුන්වා දුන් නව දැඩි තීරුබදු පිළිබඳව ශ්‍රී ලංකා - චීන මිත්‍ර සංගමය (SLCFA) දැඩි කනස්සල්ල පළකර තිබෙනවා
ඔක්තෝබර් මැද භාගයේ සිට චීනයේ ඉදිකරන ලද නැව් සඳහා ශුද්ධ ටොන් එකකට ඇමරිකානු ඩොලර් 50 ක ගාස්තුවක් අය කිරීමට ඇමරිකා එක්සත් ජනපදය ගත් තීරණයද එම කනස්සල්ල වඩාත් තීව්‍ර කරන බවයි ශ්‍රී ලංකා - චීන මිත්‍ර සංගමයේ සභාපති නීතිඥ ආනන්ද ගුණතිලක මහතා සඳහන් කර සිටියේ.
නිවේදනයක් නිකුත් කරමින් ඔහු මේ බව සඳහන් කර සිටියා
ශ්‍රී ලංකා - චීන මිත්‍ර සංගමයේ සභාපති නීතිඥ ආනන්ද ගුණතිලක මහතා නිකුත් කළ නිවේදනය පහතින්
උපුටා ගැනීම
මෑතකදී ඇමරිකා එක්සත් ජනපදය විසින් චීන භාණ්ඩ සඳහා හඳුන්වා දුන් නව දැඩි තීරුබදු පිළිබඳව ශ්‍රී ලංකා - චීන මිත්‍ර සංගමය (SLCFA) දැඩි කනස්සල්ල පළ කරයි.
ඔක්තෝබර් මැද භාගයේ සිට චීනයේ ඉදිකරන ලද නැව් සඳහා ශුද්ධ ටොන් එකකට ඇමරිකානු ඩොලර් 50 ක ගාස්තුවක් අය කිරීමට ඇමරිකා එක්සත් ජනපදය ගත් තීරණයද එම කනස්සල්ල වඩාත් තීව්‍ර කරයි.
ඇමරිකා එක්සත් ජනපද නැව් තැනීමේ කර්මාන්තයට සහාය වන බව පවසමින් ඇමරිකාව ගෙන ඇති මෙම පියවර ගෝලීය වෙළඳාමට සහ ලෝක ආර්ථිකයට බරපතල ගැටළු ඇති කරයි.
මෙම ක්‍රියා මාර්ග චීනයට පමණක් නොව සමස්ත ලෝකයටම දැඩි අයහපත් බලපෑමක් ඇති කරයි.
එම නව බදු මගින් නැව්ගත කිරීමේ පිරිවැය වැඩි කරනු ඇත.
එය රටවල් අතර භාණ්ඩ ප්‍රවාහයට බාධා කරනු ඇති අතර උද්ධමනය තවත් නරක අතට හැරෙනු ඇත. මෙය ඇමරිකා එක්සත් ජනපදයේ සහ තවත් බොහෝ රටවල පාරිභෝගිකයින්ට සහ ව්‍යාපාර වලට විශාල අයහපත් ප්‍රතිඵල ඇති කරනු ඇත.
දුෂ්කර මුල්‍ය අර්බුදයකින් පසු ශ්‍රී ලංකාව තවමත් යථා තත්ත්වයට පත්වෙමින් සිටී.
අප රට ඉතා පරිස්සමින් අපගේ ආර්ථිකය සෙමින් නැවත ගොඩනඟමින් සිටියදී ඉතා විශාල රටවල් මෙවැනි හදිසි ආර්ථික තීරණ ගන්නා විට, ඒවා අප වැනි කුඩා හා සංවර්ධනය වෙමින් පවතින ජාතීන්ට අවිනිශ්චිත භාවයක් සහ අතිශය දුෂ්කරතා ඇති කරයි.
මෙම පීඩන අපගේ යථා තත්ත්වයට පත්වීම තවත් දුෂ්කර කළ හැකිය.
මහජන චීන සමුහාණ්ඩුවේ ජනාධිපති අතිගරු ෂී ජින්පින් මහතා මැලේසියාවේ කළ සංචාරයේදී සිදු කළ මෑත කාලීන ප්‍රකාශ සමඟ අයි එකඟ වෙමු.
ආසියානු රටවල් භූ දේශපාලනික ගැටුම්, අසාධාරණ වෙළඳ පිළිවෙත් සහ ආරක්ෂණවාදයට එරෙහිව එක්ව සිටිය යුතු බව ඔහු පැවසීය.
ඔහුගේ පණිවිඩය මේ මොහොතේ වැදගත් බව අපි විශ්වාස කරමු. සාමකාමීව, ශක්තිමත්ව සහ ස්වාධීනව සිටීමට කලාපයක් ලෙස සියලු ජාතීන් එක්ව කටයුතු කළ යුතුය.
එක් තීරයක් එක් මාවතක් වැඩසටහන, ගෝලීය සංවර්ධන වැඩසටහන සහ ගෝලීය ආරක්ෂක වැඩසටහන වැනි ව්‍යාපෘති හරහා ගෝලීය සහයෝගීතාවයට සහාය වීමට චීනය දරන උත්සාහයන් සැබෑ නායකත්වයේ ලකුණකි.
ඇමරිකා එක්සත් ජනපදයේ මෑත කාලීන ක්‍රියාකාරකම් හේතුවෙන් බොහෝ ජාත්‍යන්තර සබඳතා ආතතියට පත්ව ඇති අවස්ථාවක චීන ජනාධිපතිවරයාගේ මෙම අදහස් බලාපොරොත්තුවක් ගෙන එයි.
සියලුම රටවල් එකට වැඩ කිරීම, විවෘතව අදහස් හුවමාරු කිරීම සහ සාධාරණ ගෝලීය වෙළඳාමට සහාය වීම වැදගත් බව ශ්‍රී ලංකා - චීන මිත්‍ර සංගමය විශ්වාස කරයි.
විශාල ජාතීන් අන් අයට හානි කිරීමට තම බලය භාවිතා නොකළ යුතුය.
ඒ වෙනුවට, විශේෂයෙන් ශ්‍රී ලංකාව වැනි කුඩා රටවල් සඳහා උපකාරී වන සැමට ස්ථාවර සහ සාධාරණ ගෝලීය ආර්ථිකයක් ගොඩ නැගීමට උදව් කළ යුතුය.
අපි ස්වාධීන රටක් ලෙස චීනය සමඟ සාමය, සාධාරණත්වය සහ සහයෝගීතාවයට සහාය දක්වන සියලුම ජාතීන් සමඟ එක්ව සිටින්නෙමු.
අපගේ ගෝලීය ආර්ථිකයේ අනාගතය සහ සකල ලෝකවාසී ජනතාවගේ යහ පැවැත්ම ආරක්ෂා කිරීමට අපි එක්ව කටයුතු කරමු."
උපුටා ගැනීම අවසන්
