Saturday, March 6, 2021

General line - 0115112241

අනතුරට පත්වූ  MV Eurosun නෞකාවේ බඳට හානියක් වී නැහැ - නාවික හමුදාව කියයි (PHOTOS)

929Views



ශ්‍රී ලංකාවට ගිණිකොන දෙසින් වූ මුහුදේ ගොඩබිම සිට නාවික සැතපුම් 5.5ක් (කිලෝමීටර 10ක්) පමණ දුරකින් 2020 ජනවාරි 23 වන දින කුඩා රාවණා පරයේ  සිරවී අනතුරට පත්ව තිබූ MV Eurosun නැමති නෞකාවේ බඳට හානියක් සිදුවී නොමැති බව නාවික හමුදාව විසින් සිදුකළ පරීක්ෂණ වලින් හෙළිවී ඇති බව නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා ප්‍රකාශ කර සිටිනවා.

නෞකාව අනතුරට ලක්වූ මුහුදු ප්‍රදේශය වෙත නාවික හමුදා කිමිදුම් කණ්ඩායමක් සමගින් ශ්‍රී ලංකා නාවික හමුදාවේ රත්නදීප ‍නෞකාව ලඟාවී මූලික විමර්ශණ ආරම්භ කර තිබෙන බවයි නාවික හමුදාව පැවසුවේ.

එම මූලික විමර්ශණයන්ට අනුව අනතුර හේතුවෙන් නෞකාවේ බඳට හානි වීමක් වාර්ථා නොවූ අතර, නෞකාව තුලට ජලය කාන්දු ‍වීමක් හෝ අනතුර හේතුවෙන් සාගරයට ඉන්ධන කාන්දුවීමක් ද වාර්ථා නොවීය. එමෙන්ම නෞකාවේ කාර්ය මණ්ඩලයේ සිටි එම නෞකාවේ කපිතාන් ඇතුළු පිලිපීන ජාතිකයින් 15 දෙනා සහ ඉතියෝපියානු ජාතිකයින් තිදෙනාටද මෙම අනතුර හේතුවෙන් හානියක් සිදුවී නොමැති බවටද අණාවරණය වි ඇත.

නාවික හමුදා කිමිදුම් කණ්ඩායම් විසින් අද (24) නෞකාවේ දියයට බඳ කොටස වැඩි දුරටත් පුළුල් ලෙස පරීක්‍ෂා කිරීමෙන් අනතුරුව, අනතුර හේතුවෙන් නෞකාවේ බඳ කොටසට හානියක් සිදුවී නොමැති බවට තහවුරු කර ඇත. නෞකාවේ පසුපස සිට ඉදිරියට මීටර 70ක පමණ කොටසක් ගල්පරයේ සිරවී තිබෙන බවයි එහිදී තහවුරු කර ගෙන ඇත්තේ.

කෙසේ නමුත් එම මුහුදු ප්‍රදේශයේ පවත්නා වඩදිය තත්වය හමුවේ ඇති වූ දිය වැල් ‍වල බලපෑමෙන් මේ වන විට නෞකාව ගල් පරයෙන් ඉවත් වී ඇති අතර, නෞකාව ගල් පරයේ සිරවී තිබූ කොටසට‍‍ කිසියම් හානියක් සිදුවී ඇත්දැයි පරීක්‍ෂා කිරීම සඳහා නෞකාව ආරක්‍ෂිතව නැංගුරම්ලා නැවත වරක් නාවික හමුදා කිමිදුම් කණ්ඩායම් මගින් පරීක්‍ෂා කිරීමට නියමිතව ඇත.

ශ්‍රී ලංකා වෙරළාරක්‍ෂක දෙපාර්තමේන්තුවේ සමාරක්‍ෂා නෞකාව සමුද්‍රීය පරිසර අධිකාරියේ නිලධාරීන් පිරිසක්  සමඟ අනතුරට පත් නෞකාව පිහිටි මුහුදු ප්‍රදේශය වෙත ළඟාවී ඇති අතර, හදිසි ඉන්ධන කාන්දුවීමක් ඇතිවුවහොත් එය  කළමනාකරණය කර ගැනීම සඳහා අවශ්‍ය උපකරණ ද සමගින් මේ වන විට ශ්‍රී ලංකා වෙරළාරක්‍ෂක දෙපාර්තමේන්තුවේ සමුද්‍රාරක්‍ෂා නෞකාවද එම මුහුදු ප්‍රදේශය වෙත ලඟාවී ඇත. එමෙන්ම මෙම මෙහෙයුමට සහය වීම සඳහා හම්බන්තොට ජාත්‍යන්තර වරාය සමාගමේ (Hambanthota International Port Group) පණ්ඩුකාභය නැමැති ටග් යාත්‍රාව ද (Tug  Pandukabhaya) එම මුහුදු ප්‍රදේශයේ ස්ථානගත කර ඇත.

තවද, MV Eurosun නැමති නෞකාව අනතුරට පත්වීම‍ හේතුවෙන් නෞකාවේ බඳට හානියක් සිදුවී ඇත්දැයි තක්සේරු කිරීමක් නාවික හමුදා කිමිදුම් කණ්ඩායම් විසින් සිදු කරන ලද අතර, මේ වන තෙක් සිදු කරන ලද පරීක්‍ෂාවන්ට අනුව නෞකාවේ බඳට මෙම අනතුර හේතුවෙන් හානියක් සිදුවී නොමැති බව නිරීක්‍ෂණය වී ඇති බවයි නාවික හමුදාව පවසන්නේ.

මෙවැනි තවත් උණුසුම් සහ සත්‍ය පුවත් එසැණින් දැන ගැනීමට Neth FM Viber Group එක හා මෙතනින් එකතු වන්න.Click Here