ඉන්දීය ප්‍රිමියලීග් ක්‍රිකට් තරඟාවලියේ පැවති 13වන තරඟයෙන් තියුණු ජයක් හිමි කර ගැනීමට කොල්කටා නයිට් රයිඩර්ස් කණ්ඩායම අද සමත් වුණා. ඒ, ගුජරාට් ටයිටන්ස් කණ්ඩායම කඩුලු 3කින් පරාජයට පත් කරමින්.
කාසියේ වාසිය දිනූ ගුජරාට් ටයිටන්ස් කණ්ඩායම තීරණය කළේ පළමුව පන්දුවට පහර දීමටයි. ඒ අනුව, ඔවුන් නියමිත පන්දුවාර 20 අවසානයේ කඩුලු 4ක් දැවී ලකුණු 204ක් රැස් කළා. විශිෂ්ට පිති හරඹයක නිරත වූ විජේශන්කර් පන්දු 24කදී නොදැවී ලකුණු 63ක් රැස් කළා. ඊට 6යේ පහර 5ක් සහ 4රේ පහර 4ක් ඇතුළත්.
සායි සුදර්ශන් පන්දු 38කදී 6යේ පහර 2ක් සහ 4රේ පහර 3ක් සමඟින් ලකුණු 53යි. පන්දු යැවීමේදී සුනිල් නරායන් ලකුණු 33කට කඩුලු 3ක් දවා ගත්තා.
ලකුණු 205ක ජයග්‍රාහී ඉලක්කයක් හඹා ගිය කොල්කටා නයිට් රයිඩර්ස් කණ්ඩායම නියමිත පන්දුවාර 20 අවසානයේ කඩුලු 7ක් දැවී ලකුණු 207ක් රැස් කළා.
වෙන්කටෙෂ් අයියර් පන්දු 40කදී ලකුණු 83ක් රැස් කළා. ඊට 6යේ පහර 5ක් සහ 4රේ පහර 8ක් ඇතුළත්. ප්‍රවේගකාරී පිතිහරඹයක නිතර වූ රින්කු සිං පන්දු 21කදී නොදැවී ලකුණු 48ක් රැස් කළේ 6යේ පහර 6ක් සහ එක් 4රේ පහරක් සමගින්.
මෙහිදී විශිෂ්ට පන්දු යැවීමක නිරත වූ රෂිඩ් ඛාන් කඩුලු ත්‍රිත්වයක් ලබා ගත්තා. තරඟය ජය ගැනීම සඳහා අවසන් පන්දුවාරයේදී කොල්කටා නයිට් රයිඩර්ස් කණ්ඩායමට ලබා ගත යුතුව තිබූ ලකුණු සංඛ්‍යාව 29ක්.
එහිදී පන්දුවට පහර දුන් රින්කු සිං පන්දු 5කදී 6යේ පහර 5ක් එල්ල කරමින් කොල්කටා නයිට් රයිඩර්ස් කණ්ඩායම ජයග්‍රහණය කරා රැගෙන ගියා. තරඟයේ වීරයා ලෙස රින්කු සිං සම්මාන හිමි කරගත්තා.
