චීන අපරාධ ව්‍යවසායන්ගේ ගෝලීය පැවැත්ම සැලකිය යුතු මට්ටමින් වර්ධනය වී ඇති අතර, විවිධ කලාප සහ කර්මාන්ත හරහා ඒවා ව්‍යාප්ත වෙමින් පවතින බව විදෙස් මාධ්‍ය වාර්තා කරනවා.
ඒ අනුව එක්සත් රාජධානියේ නවීන මුදල් විශුද්ධිකරණ යෝජනා ක්‍රමවල සිට පිලිපීනයේ නීති විරෝධී ඔන්ලයින් ක්‍රීඩා මෙහෙයුම් දක්වා, මෙම ව්‍යවසායන් නීතිමය හිඩැස් සූරාකෑම මෙන්ම මිනිස් ජාවාරමේ යෙදෙන අතර පුළුල් පරාසයක අපරාධ ක්‍රියාකාරකම්වලට දායක වන බවයි එම වාර්තා පෙන්වා දෙන්නේ.
මෙම නීතිවිරෝධී මෙහෙයුම්වලට චීන ජාතිකයන් සම්බන්ධ වීම ඔවුන්ගේ කීර්තිනාමයට බාධාවක් පමණක් නොව ගෝලීය ස්ථාවරත්වයට සහ ආරක්ෂාවට වර්ධනය වන තර්ජනයක් බවයි ජාත්‍යන්තර විචාරකයින් පෙන්වා දෙන්නේ.
එක්සත් රාජධානියේ මෑත කාලීන සිද්ධියක් චීන අපරාධ ජාලයේ විශාල පරාසයක් පෙන්නුම් කරනවා. ඒ අනුව චීන සම්භවයක් ඇති පුද්ගලයන් හත් දෙනෙකුට, පවුම් මිලියන 55ක මුදල් විශුද්ධිකරණ නඩුවක් සම්බන්ධයෙන් දඬුවම් නියම වුණා.
මෙම මෙහෙයුම විශේෂයෙන් චීනයේ දැඩි විදේශ මුදල් පාලනය මග හැරීමට උත්සාහ කළ ජාත්‍යන්තර විශ්ව විද්‍යාල සිසුන් ඉලක්ක කර ගනිමින් ක්‍රියාත්මක බවයි පැවසෙන්නේ.
චීන පුරවැසියන්ට පුද්ගලික අවශ්‍යතා සඳහා වසරකට ඩොලර් 50,000 කට වඩා රටින් පිටතට මාරු කිරීම සීමා කර තිබෙනවා.
මෙම සීමාව මඟ හැරීම සඳහා, බොහෝ දෙනෙක් එක්සත් රාජධානියේ චීන ඩයස්පෝරාව අතර නීති විරෝධී නමුත් බහුලව පවතින භූගත බැංකු පද්ධති වෙත යොමු වෙති.
භූගත බැංකුකරණයේදී මුදල් මාරු කරනු ලබන්නේ විධිමත් යාන්ත්‍රණයකට වඩා අවිධිමත් ලෙසිනි.
