පසුගිය 14 වනදා හෝමාගම රෝහල පාර ප්‍රදේශයේ නිවසකදී වෙඩි තබා මනුෂ්‍ය ඝාතනයක් සිදු කිරීමට තැත් කළ සැකකරුවන් දෙදෙනෙකු ගිනි අවියක් සමග මීගොඩ, ඇටිගල ප්‍රදේශයේදී අත්අඩංගුවට ගෙන තිබෙනවා.
ඒ, බස්නාහිර පළාත් දකුණු දිසා අපරාධ කොට්ඨාසයේ නිලධාරීන්ට ලද තොරතුරක් මත සිදු කළ වැටලීමකදීයි.
වෙඩි තබා මනුෂ්‍ය ඝාතනයක් සිදු කිරීමට තැත් කිරීම, බරපතල තුවාල සිදු කිරීම සහ අනර්ථය සිදු කිරීම යන චෝදනාවලට අදාළවයි ඔවුන් අත්අඩංගුවට ගෙන ඇත්තේ.
අත්අඩංගුවට ගත් සැකකරුවන් අවුරුදු 23 සහ 26 යන වයස්වල පසුවන කොළඹගේආර සහ මීගොඩ ප්‍රදේශවල පදිංචිකරුවන් බව පොලීසිය පැවසුවා.
සැකකරුවන්ගෙන් සිදු කළ ප්‍රශ්නකිරීම්වලදී අනාවරණ වී ඇත්තේ මෙම වෙඩි තැබීම විදෙස් රටක සැඟව සිටින මත්ද්‍රව්‍ය ජාවාරම්කරුවෙකුගේ උපදෙස් මත සිදු කර ඇති බවයි.
සිද්ධිය සම්බන්ධයෙන් වැඩිදුර විමර්ශන බස්නාහිර පළාත් දකුණු දිසා අපරාධ කොට්ඨාසය මගින් ක්‍රියාත්මකයි.
