උතුරු පළාතේ ධාවනය වන ලංකා ගමනාගමන මණ්ඩලයට අයත් බස්රථ නව බස්නැවතුම්පල වෙත රැගෙන නොයෑම හා පැරණි ලංගම බස්නැවතුම්පල ඉදිරිපිට සිට පෞද්ගලික බස්රථ නවතා මගීන් රැගෙන යෑමට ලංගම බස්රථ රියදුරන් බාධා කිරීමට එරෙහිව පෞද්ගලික බස්රථ රියදුරන් වවුනියාව පැරණි ලංගම බස්නැවතුම්පල ඉදිරිපිට අද (17) ආරම්භ කළ විරෝධතාවයත් සමග දෙපිරිස අතර දැඩි නොසන්සුන්කාරී තත්වයක් හට ගැනුණා.
විරෝධතාවයේ නිරත පෞද්ගලික බස් රියදුරන් උතුරු පළාතේ ධාවනය වන ලංකා ගමනා ගමන මණ්ඩලයේ බස්රථවලට මගීන් රැගෙන යෑමට ඉඩ නොදී යාපනය නුවර ඒ 09 මාර්ගය එක් මන්තීරුවක් අවහිර කරමින් විරෝධතාවය දැක්වුවා.
විරෝධතාවය අතරවාරයේ පෞද්ගලික බස්රථ රියදුරන් විසින් ලංකා ගමනාගමන මණ්ඩලයට අයත් බස්රථවලට යතුරු පැදි හිස්වැසුම් යොදා ගනිමින් පහරදීම සිදුකළ අතර එහිදී බස්රථ දෙකකට හානි සිදුවූ බව වවුනියාව පොලිසිය පැවසුවා.
ලංකා ගමනාගමන මණ්ඩලයේ බස්රථවලට ප්‍රහාර එල්ල කිරීම හේතුවෙන් ලංකා ගමනගමන මණ්ඩලයේ රියදුරන් හා කොන්දොස්තරවරුන් යාපනය නුවර ඒ නවය මාර්ගයේ අනෙක් පස මංතීරුව බස්රථ යොදාගනිමින් අවහිර කරමින් විරෝධතාවය දැක්වුවා.
විරෝධතාවය හේතුවෙන් යාපනය නුවර ඒ09 මාර්ගයේ පැය දෙකකට ආසන්න කාලයක් රථවාහන ධාවනයට බාධා එල්ලවූණා.
පෞද්ගලික බස්රථ රියදුරන් හා ලංගම බස්රථ රියදුරන්ගේ විරෝධතාවයත් සමග දෙපාර්ශ්වය අතර ගැටුමක් ද හටගත් අතර එහිදී රියදුරන් කිහිපදෙනෙකුට සුළු තුවාල සිදු වූ බවයි අප වාර්තාකරු සඳහන් කළේ.
