සයිටම් ආයතනය සම්බන්ධයෙන් උද්ගතව තිබෙන ගැටලූ නිරාකරණය කරගැනීම සඳහා පත්කර තිබෙන ජනාධිපති කමිටු වාර්තාව නිකුත් කර තිබෙනවා. මෙම වාර්තාව සකස් කර ඇත්තේ නියෝජ්‍ය අමාත්‍ය හර්ෂ ද සිල්වා ප‍්‍රමුඛ පංච පුද්ගල කමිටුවක් විසින්.
උසස් අධ්‍යාපන සහ මහාමාර්ග අමාත්‍යාංශ ලේකම් ඞී.සී. දිසානායක, සෞඛ්‍ය අමාත්‍යාංශයේ ලේකම් ජනක සුගතදාස, නීතිපති ජයන්ත ජයසූරිය සහ විශ්ව විද්‍යාල ප‍්‍රතිපාදන කොමිසමේ සභාපති මොහාන් ද සිල්වා ද මෙම කමිටුවට ඇතුළත්. කමිටුවේ සාමාජිකයන් මෙම මස පළමු සතියේදී සයිටම් අර්බුදය පිළිබඳව විවිධ පාර්ශ්ව සමග සාකච්ඡා සිදුකළා.
ශ්රී ලංකා වෛද්‍ය සභාව රාජ්‍ය විශ්ව විද්‍යාල වෛද්‍ය පීඨ කිහිපයක පීඨාධිපතිවරු සමග ද ඔවුන් මේ පිළිබඳව දීර්ඝ වශයෙන් සාකච්ඡා කළ බවයි ජනාධිපති මාධ්‍ය අංශය සඳහන් කළේ. සයිටම් ආයතනයේ කාර්ය මණ්ඩලය සහ රාජ්‍ය නොවන වෛද්‍ය විද්‍යාලයන්හි දෙමාපිය සංගමය සමග ද මෙම කමිටුව සාකච්ඡා පැවැත්වූවා. කෙසේවෙතත් ඉකුත් 8 සහ 9 යන දෙදින රජයේ වෛද්‍ය නිලධාරීන්ගේ සංගමයට අදාළ කමිටුව සාකච්ඡාවක් ලබාදුන්නද ඔවුන් ඊට සහභාගි වී නැහැ.
නිකුත් කළ මෙම වාර්තාව මගින් සයිටම් ගැටලූවට විසඳුම් මාලාවක් ද හඳුන්වා දී තිබෙනවා.
