Sunday, May 26, 2024

General line - 0115112241

ආයෝජනයට ශ්‍රී ලංකාවේ තත්ත්වය අවදානම් – බ්ලූම්බර්ග් කියයි




ශ්‍රී ලංකාව අධි අවදානම් ආර්ථීක කලාපය තුළ සිටින බව නවතම වාර්තාවකින් අනාවරණය කර තිබෙනවා.

ඒ බ්ලූම්බර්ග් ගෝලීය අවදානම් දර්ශකයට අනුවයි.

ආයෝජකයින් විසින් සලකා බලනු ලබන මූල්‍ය, ආර්ථික හා දේශපාලනික කාණ්ඩයන්ට අයත් දර්ශක 29 ක් ඇසුරින් බ්ලූම්බර්ග් ගෝලීය අවදානම් දර්ශකය  සකස් කරනු ලබනවා.

0 සිට 100 දක්වා වූ බ්ලූම්බර්ග් සමහර රාජ්‍ය අවදානම් වර්ගීකරණය අනුව ශ්‍රී ලංකාවට ලැබී ඇති ලකුණු ප්‍රමාණය 12.0 ක්.

එක් එක් රටවල මහ බැංකු සතු විදෙස් සංචිත ප්‍රමාණය දළ දේශීය නිෂ්පාදිතයෙන් ප්‍රතිශතයක් ලෙසින් සලකා බලා මාසිකව එරට සංචිත පිළිබඳ ඇගයීමක් සිදුකරනු ලබන අතර එහිදී ශ්‍රී ලංකාවට ලැබී ඇති ලකුණු ප්‍රමාණය 3.6% ක්.

මීට අමතරව වාර්ෂික රැකියා වියුක්තිය පිළිබඳ සිදුකරනු ලැබූ වර්ගීකරණය අනුව 5.2% ක ලකුණු ලබා එම කාණ්ඩයෙන් අවදානම පහළ මට්ටමක සිටින රටක් ලෙසින් ශ්‍රී ලංකාව නම් කර තිබෙනවා.

මේ අතර උද්ධමන පුරෝකථනය 5.2% ක් ලෙසින් මෙහිදී ඇස්තමේන්තු කර ඇති අතර විනිමය අනුපාතික උච්ඡාවචනය සම්බන්ධයෙන් ශ්‍රේණිගත කිරීමක් ලැබීමට ශ්‍රී ලංකාව අපොහොසත් වී තිබෙන බවයි බ්ලූම්බර්ග් ගෝලීය අවදානම් දර්ශකය පෙන්වා දෙන්නේ.

මෙම වර්ගීකරණය අනුව 0 සිට 15 දක්වා ලකුණු ලබා ඇති රටවල් අධි අවදානම් කලාපයේ ඇති රටවල් ලෙසින් සලකන අතර 15 සිට 40 දක්වා ලකුණු ලබා ඇති රටවල් ඉහළ අවදානමක් ඇති රටවල් ලෙසින් වර්ගීකරණය කරනු ලබනවා.

එසේම 40 සිට 66 දක්වා රටවල් සාමාන්‍ය අවදානමක් ඇති රටවල් ලෙසින් ද 66 සිට 84 දක්වා ලකුණු ලැබූ රටවල් අවදානම අඩු රටවල් ලෙසින් ද වර්ගීකරණය වනවා.

 84 සිට 100 දක්වා ලකුණු ලබා ඇති රටවල් මෙහිදී ඉතා අවම අවදානමක් ඇති රටවල් ලෙසින් සැලකෙනවා.

මෙම වර්ගීකරණයේ පළමු ස්ථානය ලකුණු 96.5 ක් ලබා ඇති නෝර්වේ රාජ්‍යයට හිමිව ඇති අතර ලකුණු 95.8 ක් ලබා ඇති ස්විස්ටර්ලන්තය දෙවන ස්ථානයටත්, ලකුණු 94.0 ක් ලබා ඇති ස්වීඩනය තෙවන ස්ථානයටත් පත්ව තිබෙනවා.

මෙම වර්ගීකරණයේ අවසාන ස්ථානය වෙනිසියුලාවට හිමිව ඇති අතර එහි උද්ධමන පුරෝකථනය 403.5% ක් ලෙසින් එහිදී ඇස්තමේන්තු කර ඇති බව සඳහන්.