හිටපු යුධ හමුදාපති ජෙනරාල් රොහාන් දළුවත්ත මහතා කොළඹ හමුදා රෝහලේදී අද (27) දහවල් අභාවප්‍රාප්තවී තිබෙනවා. මියයන විට ඔහුගේ වයස අවුරුදු 77ක්. ශ්‍රී ලංකා යුධ හමුදාවේ 14 වන යුධ හමුදාපතිවරයා ලෙස ඔහු 1996-1998 කාලයේදී කටයුතු කරනු ලැබුවා.
1941 වසරේ මැයි මස 09 වෙනිදා අම්බලන්ගොඩදී උපත ලැබූ රොහාන් දළුවත්ත මහතා යුධ හමුදාවට බැදී ඇත්තේ 1961 වසරේ අගෝස්තු 14 වනදායි.
එල්ටිටිඊ ත්‍රස්තවාදීන් ඉලක්ක කර ගනිමින් ක්‍රියාත්මක කළ රිවිරැස මෙහෙයුමේ අණදෙන නිලධාරියා වශයෙන් කටයුතු කලේ ද රොහාන් දළුවත්ත මහතායි.
1998 වසරේදී හමුදාපති ධුරයෙන් විශ්‍රාම යාමෙන් අනතුරුව ආරක්ෂක මාණ්ඩලික ප්‍රධානි තනතුරට පත්වූ ඔහු 1999 වසරේ සිට 2002 දක්වා කාල සිමාවේ එහි කටයුතු කරනු ලැබුවා.
යුධ හමුදා මාධ්‍ය ප්‍රකාශක බ්‍රිගේඩියර් සුමිත් අතපත්තු සඳහන් කර සිටියේ හිටපු යුධ හමුදාපතිවරයාගේ අවසන් කටයුතු හමුදා ගෞරව සහිතව අගෝස්තු 29 වෙනිදා බොරැල්ල සුසාන භූමියේදී සිදුකිරීමට නියමිත බවයි.
