මහ කන්නයේ වගා කළයුතු කුඹුරු ප්‍රමාණයෙන් සමස්තයක් ලෙස සියයට 90 ත් 95 ත් අතර ප්‍රමාණයක් වගා කර ඇති බව කෘෂිකර්ම අමාත්‍යාංශය පවසනවා. ඉකුත් මහ කන්නයට සමගාමීව මෙවර සියයට 70 ත් 75 ත් අතර අස්වැන්නක් ලබාගත හැකි බව කොළඹ අද පැවති ප්‍රගති සමාලෝචන රැස්වීමේදී එම නිලධාරීන් පෙන්වා දුන් බවයි කෘෂිකර්ම අමාත්‍යාංශය සදහන් කළේ.
එම රැස්වීමට කෘෂිකර්ම අමාත්‍ය මහින්දානන්ද අලුත්ගමගේ, රාජ්‍ය අමාත්‍ය ශෂීන්ද්‍ර රාජපක්‍ෂ, දිස්ත්‍රික් කෘෂිකර්ම නිලධාරීන්, ගොවිජන සංවර්ධන නියෝජ්‍ය කොමසාරිස්වරු, දිස්ත්‍රික් පොහොර අධ්‍යක්‍ෂකවරු සහ පළාත් කෘෂිකර්ම අධ්‍යක්‍ෂවරු ඇතුළු පිරිසක් එක්ව තිබෙනවා.
මහ කන්නයේ වගා කර ඇති කුඹුරු ඉඩම් ප්‍රමාණය, ඉන් අපේක්‍ෂිත අස්වැන්න, පොහොර බෙදාහැරීම හා ගොවීන් පොහොර භාවිතය පිළිබද තොරතුරු එහිදී දිස්ත්‍රික් මට්ටමින් ඉදිරිපත් කෙරුණු බවයි කෘෂිකර්ම අමාත්‍යාංශය සදහන් කළේ. ලබන කන්නයේ සිට වී වගාව සදහා පොහොර සම්පූර්ණ පැකේජයක් ලබාදීම කටයුතු කරන බවත් ඒ අනුව ලැබෙන අස්වැන්නට පොහොර නිෂ්පාදකයින් වගකීමෙන් බැදී සිටිය යුතු බවත් කෘෂිකර්ම අමාත්‍ය මහින්දානන්ද අලුත්ගමගේ මෙහිදී ප්‍රකාශ කර තිබෙනවා.
