මෙරට ක්‍රියාත්මක වූ අන්තර් ජාල වංචාවක් හරහා වංචා කල රුපියල් කෝටි 5000කට අධික මුදලක් චීනයට යවා ඇතැයි කියන සිද්ධියක් සම්බන්ධයෙන් මේ වන විට තොරතුරු වාර් තා වනවා.
මෙම ජාවාරමට චීන ජාතිකයන් ඇතුළු විදෙස් සැකකරුවන් පිරිසක් සම්බන්ධ බවටයි වාර්තා වන්නේ.
මෙම ජාවාරම සම්බන්ධයෙන් දැනට අත්අඩංගුවට ගෙන ඇති පිරිස 37ක්.
අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය සිදු කල විමර්ශනයකදී මේ බව හෙළි වී ඇති අතර ඒ සම්බන්ධයෙන් එම කොට්ඨාසය කොළඹ ප්‍රධාන මහේස්ත්‍රාත් තිළිණ ගමගේ හමුවේ අදාල තොරතුරු දැනුම් දී තිබෙනවා.
එහිදී අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය දැනුම් දී ඇත්තේ
අන්තර්ජාලය හරහා රුපියල් කෝටි 5000කට අධික මුදලක් වංචා කිරීමට අදාළව චීන ජාතිකයන් ඇතුළු විදෙස් සැකකරුවන්ට එරෙහිව විමර්ශන ආරම්භ කර ඇති බවයි.
ඊට සහාය දීම සඳහා චීන හා සිංගප්පූරු පොලිසිවල විශේෂඥ විමර්ශන කණ්ඩායම් ලංකාවට පැමිණෙන බව තහවුරු කර ඇතැයි අපරාධ පරීක්ෂණ දෙපාර්තමේන්තුව ප්‍රධාන මහේස්ත්‍රාත්වරයාට දැනුම් දී තිබෙනවා.
මෙම සිද්ධියට අදාළව ආරම්භ කර ඇති විමර්ශනවලට සහය දෙන ලෙස ඉන්දියාවෙන් සහ පකිස්තානයෙන් ද ඉල්ලා ඇති බවයි අපරාධ පරීක්ෂණ දෙපාර්තමේන්තුව දැනුම් දී ඇත්තේ.
සිද්ධියට අදාළ පැමිණිල්ල කැඳවු අවස්ථාවේදී සිද්ධියට අදාළව රිමාන්ඩ් බාරයට පත් කර සිටින ශ්‍රී ලාංකිකයන් තිදෙනා හා විදේශකයන් 34 දෙනා බන්ධනාගාර නිලධාරීන් විසින් අධිකරණයට ඉදිරිපත් කර තිබෙනවා.
එම පිරිස අතරට චීනය, පාකිස්තානය, ඉන්දියාව, බංගලාදේශය, ඉන්දුනීසියාව, ඇල්ජීරියාව හා නේපාලය යන රටවල පිරිසක් අයත්.
සැකකරුවන් පළමුව ඩුබායි රාජ්‍යයේ රාජ්‍යයේ දී සයිබර් අපරාධයක් කිරීමට උත්සාහ කිරීමේ දී එරට පොලිසිය විමර්ශන ආරම්භ කිරීම හේතුවෙන් ඔවුන් මෙරටට පැනවිත් ඇති බවයි විමර්ෂණ වලදී හෙලිවී ඇත්තේ.
එලෙස ඩුබායි රාජයේ සිට පලා ඒමේ දී ඩුබායි වැසියන් රවටා ලබාගත් ඩුබායි බැංකු ගිණුම් 100ක් හා ලාංකික බැංකු ගිණුම් 46ක් හරහා මෙම මූල්‍ය වංචාව කර ඇති බවයි විමර්ශන වල දී අනාවරණය වී ඇත්තේ.
පරිගණක යන්ත්‍ර 45ක්, ජංගම දුරකථන හා වෙනත් තාක්ෂණික මෙවලම් යොදා ගනිමින් බයිනැන්ස් ගිණුම් හරහා යු එස්. ඩී.ටී. ක්‍රිප්ටො කරන්සි උපයෝගි කරගෙන මෙම වංචාව කර ඇති බවද සදහන්.
සැකකරුවන් මීගමුව ඒත්තුකාල ප්‍රදේශයේ කාමර 30කින් සමන්විත තෙමහල් හෝටලයක් රුපියල් ලක්ෂ 80ක මාසික කුලියට ගෙන පෞද්ගලික ආරක්ෂකයන් යොදා ගනිමින් මෙම ජාවාරම ක්‍රියාත්මක කර ඇති බවයි විමර්ෂණ වලින් හෙලි වී ඇත්තේ.
සැකකරුවන්ගේ දෛනික ආදායම රුපියල් ලක්ෂ 800 ඉක්ම වූ අවස්ථා ද ඇති බව වාර්තා වනවා.
සිද්ධියට අදාළව රිමාන්ඩ් බාරයේ රඳවා සිටි මහනුවර මහ රෝහලේ වෛද්‍යවරයෙකු, ඔහුගේ පුත්‍රයා සහ අනුරාධපුරයේ පදිංචි කරුවෙකු වෙනුවෙන් පෙනී සිටි නීතිඥවරුවරුන් වන නීතිඥ සංජය ආරියදාස , නීතිඥ ඉසුරු එදිරිසිංහ සහ නීතිඥ පුබුදු රන්දිම කරුණු දක්වමින් සැකකාර වෛද්‍යවරයා මෙම සිද්ධියේ පළමු සැකකාර ගවේෂ බණ්ඩාර නමැත්තාගේ ඥාතියකු බවයි.
එහෙයින් ඔහු විශ්වාස කර බැංකු ගිණුම් පිළිබඳ තොරතුරු දී ඇති බවත් කෙසේ වෙතත් මෙය නීති විරෝධී ක්‍රියාවක් බව නොදැන ඔවුන් මෙම සිද්ධියට සම්බන්ධ වී ඇති බවද ප්‍රකාශ කලා.
ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරයා සැකකරුවන් සන්තකයේ තිබී සොයාගත් මුදල් මහ බැංකුවට බාරදීමට නියම කළා.
එමෙන්ම සැකකාර වෛද්‍යවරයා ඇතුළු තිදෙනා ඇප මත මුදා හැරීමට නියම කල අතර සෙසු සැකකරුවන් 34 දෙනා ලබන 25 වැනිදා දක්වා තවදුරටත් රක්ෂිත බන්ධනාගාර ගත කල මහේස්ත්‍රාත්වරයා සිද්ධියට අදාළ විමර්ශන වල ප්‍රගතිය එදින අධිකරණයට දැනුම් දීමට පොලිසියට නියම කර තිබෙනවා.
