වසර 13කින් වන අලි සංගණනයක් අද ආරම්භ වනවා.
මධ්‍යස්ථාන 3,200ක් පමණක් කේන්ද්‍ර කර ගනිමින් එම සංගණනය දින තුනක් පුරාවට සිදු කරන බවයි වනජීවී අධ්‍යක්ෂ ජනරාල් එම් ජී සී සූරියබණ්ඩාර පැවසුවේ.
ඒ සඳහා 7,000ක පමණ වන ජීවී නිලධාරීන් පිරිසක් යොමු කර තිබෙනවා. මේ හේතුවෙන් වන ජීවී නිලධාරීන්ගේ නිවාඩුද අවලංගු කළ බවයි වනජීවී අධ්‍යක්ෂ ජනරාල්වරයා පැවසුවේ.
දින තුනක් පුරා වන අලින් සම්බන්ධයෙන් ලබා ගන්නා තොරතුරු පරිගණකගත කිරීමට නියමිතයි. ඒ අනුව මාස තුනකින් පසු මෙරට වනඅලි ගහණය සම්බන්ධයෙන් වාර්තාවක් එළි දැක්වීමට නියමිතව තිබෙනවා.
එම වාර්තාවේ ඇතුළත් තොරතුරු පදනම්ව වනඅලි සම්බන්ධයෙන් සියලු තීන්දු තීරණ ගන්නා බවයි වනජීවී අධ්‍යක්ෂ ජනරාල් එම් ජී සී සූරියබණ්ඩාර පැවසුවේ.
අවසන් වරට දිවයිනම ආවරණ වන පරිදි වනඅලි සංගණනයක් සිදු කර තිබුණේ 2011 වසරේදීයි. මෙරට තුළ වනඅලි 5,879ක් ජීවත්ව සිටින බව එහිදී අනාවරණ වී තිබෙනවා.
