මැලේසියාවේදී පැවැත්වෙන අවුරුදු 19න් පහළ කාන්තා විස්සයි විස්ස ලෝක කුසලාන ක්‍රිකට් තරගාවලියේ ශ්‍රී ලංකා කණ්ඩායම අද සහභාගී වූ තරගයෙන් ලකුණු 81ක දැවැන්ත ජයක් අත්කර ගත්තා.
ඒ, බටහිර ඉන්දීය කොදෙව් 19න් පහළ කාන්තා ක්‍රිකට් කණ්ඩායම පරාජයට පත් කරමින්.
මෙම තරගයේ පළමුව පන්දුවට පහරදුන් ශ්‍රී ලංකා ක්‍රීඩිකාවන් නියමිත පන්දුවාර 20 තුළ කඩුලු 05ක් දැවී ලකුණු 166ක් රැස් කළා. නායිකා මනුදි නානායක්කාර ලකුණු 41යි.
පිළිතුරු ඉනිම ක්‍රිඩා කළ බටහිර ඉන්දීය කොදෙව් ක්‍රීඩිකාවන්ට පන්දුවාර 19යි පන්දු 04කදී සියලු දෙනා දැවී ලබාගත හැකි වුණේ ලකුණු 85ක් පමණයි.
පන්දු යැවීමේදී චමෝදි ප්‍රබෝධා ලකුණු 16කට කඩුලු 03ක් දවා ගත්තා.
මෙම තරගාවලියේ ශ්‍රී ලංකා කණ්ඩායම මීට පෙර සහභාගී වූ තරගයේදී මැලේසියානු කණ්ඩායම පරදවා ලකුණු 139ක ජයක් අත්කර ගැනීමට සමත් වුණා.
