මූලික වියදම, මූලික ආදායමට වඩා වැඩි වීමකින් තොරව එනම් ප්‍රාථමික ගිණුම සෘණ වීමකින් තොරව මේ අවස්ථාවේ වැටුප් වැඩි කළහැකි ක්‍රමවේදයක් ඇත්නම් පෙන්වා දෙන ලෙස විවිධ වෘත්තීය සමිති නියෝජනය කරන දේශපාලන පක්ෂ වලට තමන් ආරාධනා කරන බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය පවසනවා.
ඊයේ රාත්‍රී යටියන්තොට ප්‍රදේශයේ පැවති ආගමික වැඩසටහනකට සහභාගී වූ අවස්ථාවේ මාධ්‍යවේදීන් යොමුකළ ප්‍රශ්නකට පිලිතුරු ලබාදෙමින් අමාත්‍යවරයා මේ බව ප්‍රකාශ කළා.
එහිදී වැඩිදුරටත් අදහස් දක්වමින් අමාත්‍යවරයා සඳහන් කළේ තෘප්තිමත් ඵලදායී රාජ්‍ය සේවයක් ඇති කර ගැනීම වැදගත් බවයි.
මීට වසර දෙකකට පමණ පෙර 1372000 ක්වූ රාජ්‍ය සේවකයාගේ වැටුප ගෙවීම පවා ගැටළුවක්ව පැවති බව සඳහන් කළ අමාත්‍යවරයා 2024 වසරේදී ජනාධිපතිවරයා මුදල් අමාත්‍යවරයා ලෙස රාජ්‍ය සේවක වැටුප රු. 10000 කින් වැඩි කිරිමට කටයුතු කළ බව සඳහන් කළා.
හැකියාවක් පවතී නම් එය තවත් වැඩි කළ යුතු බව තම අදහස බව සඳහන් කළ අමාත්‍යවරයා රාජ්‍ය සේවයේ එක් එක් , විවිධ කොටස් වලට සීමා වූ ප්‍රශ්න රාශියක් ඇති බව පිලිගන්නා බවද සඳහන් කළා.
මෙම ගැටළු වලට විසඳුම් සෙවීමේදී සිදුවන්නේ තවත් වියදම් කිරීමක් බැවින් එමගින් ඇතිවන්නේ භාණ්ඩාගාරයට වැය බරක් ඇති වීම බව සඳහන් කළ අමාත්‍යවරයා දෙකෝටි විසි ලක්ෂයක් වූ ජනතාව වෙනුවෙන් ගත් දැඩිව බැදුනු තීන්දු ක්‍රියාත්මක කිරීමට දැඩිව රජය බැදී සිටින බවද සඳහන් කළා.
එක් එක් කණ්ඩායම් වල ප්‍රශ්න වලට පැලැස්තර විසඳුම් සෙවීමේදී තවත් ප්‍රශ්න රාශියක් උද්ගත වන බව සඳහන් කළ අමාත්‍යවරයා , මෙම සියළු ප්‍රශ්න වලට ස්ථිරසාර විසඳුම් ලබාදීම සඳහා හිටපු ජනාධිපති ලේකම්වරුන්ගෙන් සමන්විත කමිටුවක් පත් කර 2025 අයවැය මගින් එම විසඳුම් ඉදිරිපත් කිරීමට ජනාධිපතිවරයා අවශ්‍ය පියවර ගෙන ඇතැයිද සඳහන් කළා.
රට වැටී තිබුණු තත්ත්වයේ සිට නැගිටිමින් සිටින මොහොතක ,තම තමන්ගේ වගකීම , රට තිබෙන තත්ත්වය, ගමන් කරන ධනාත්මක තත්ත්වය සියළු දෙනා තේරුම්ගෙන ක්‍රියා කළ යුතු බවද සඳහන් කර සිටියා.
