Friday, April 4, 2025

General line - 0115112241

ලොවක් බලා සිටි ට්‍රම්ප්ගේ බදු ලැයිස්තුව එළියට - ශ්‍රී ලංකාවටත් සියයට 44ක්



ඕනෑම රටකින් අමෙරිකාවට ආනයනය කරන භාණ්ඩ සඳහා සියයට 10ක අවම බද්දක් පැනවීමට එරට ජනාධිපති ඩොනල්ඩ් ට්‍රම්ප් තීරණය කර තිබෙනවා.

නව බදු හේතුවෙන් බලපෑමට ලක්වන රටවල් සංඛ්‍යාව සියයක්.

එහි වැඩිම බද්ද වන සියයට 49ක් පනවා ඇත්තේ කාම්බෝජයටයි.

ශ්‍රී ලංකාවටද සියයට 44ක බද්දක් පනවා තිබෙනවා.

ශ්‍රී ලංකාව අයත් වන්නේ ඉහළම බදු අගයක් අය කරන රටවල් අතරටයි. 

චීනයට සියයට 34ක්, ඉන්දියාවට සියයට 26ක්, ජපානයට සියයට 24ක්, පකිස්ථානයට සියයට 29ක් ඇතුළුව ආසියානු රටවල් බහුතරයකට ඉහළ බදු පනවා තිබීම විශේෂත්වයක්.

සිංගප්පූරුවටද සියයට 10ක බද්දක් පනවා තිබෙනවා.

ආසියානු රටවල් ඉලක්ක කර සියයට 10 සිට සියයට 49 දක්වා ඉහළ බදු පනවා තිබීමද කැපී පෙනෙන තත්ත්වයක්.

යුරෝපා සංගමයට සියයට 20ක බද්දක් පනවා ඇති අතර ස්විට්සර්ලන්තයටද සියයට 37ක බද්දක් පනවා තිබෙනවා.

යුරෝපා සංගමයට පනවා ඇති බදු රටවල් 27කට බලපානු ඇති.

ජනාධිපති ඩොනල්ඩ් ට්‍රම්ප් විසින් නව බදු පනවන රටවල් 100 ක ලැයිස්තුවක් මේ වන විට එළි දක්වා තිබෙනවා.

මෙම නව බදු අප්‍රේල් 5 වන දින සිට ක්‍රියාත්මකයි. කැනඩාව සහ මෙක්සිකෝව සඳහා මීට පෙර පැනවූ බදු හැර නව බදු පනවා නැහැ.  

මීට පෙර එම රටවලට සියයට 25ක තීරුබදු පැනවූවා. 

අමෙරිකාවට සිදු කරන මෝටර් රථ ආනයනය සඳහා ද සියයට 25ක නව තීරුබදු පනවා තිබෙනවා.

එම තීරුබදු වහාම ක්‍රියාත්මක වන පරිදි අද මධ්‍යම රාත්‍රියේ සිට ක්‍රියාත්මක වනු ඇති. 

නව බදු ප්‍රකාශයට පත් කරමින් අමෙරිකානු ජනාධිපතිවරයා පැවසුවේ බදු පැනවූ දිනය අමෙරිකාවේ “විමුක්ති දිනය” ලෙස හඳුන්වන බවයි.

එමගින් ඇමෙරිකාවට “ස්වර්ණමය යුගයක්” ආරම්භ වන බවයි ඔහු පවසන්නේ.

කෙසේවෙතත් ඇතැම් ලෝක නායකයින් බදු පැනවීම පිළිබඳ කලකිරීමෙන් ප්‍රතිචාර දක්වා ඇති අතර උත්සන්න වන වෙළඳ යුද්ධයක් පිළිබඳවද කනස්සල්ල පළ කර ඇති බවයි විදෙස් මාධ්‍ය වාර්තා කළේ. 

WhatsApp Image 2025-04-03 at 06.42 by nethsound on Scribd