නෛතික ප්‍රතිපාදන අනුව නිසි කාලය තුළ ජනාධිපතිවරණය පැවැත්වීම පිළිබඳ සභාව කල්තැබීමේ විවාදය අද දිනයේ පැවැත්වීමට නියමිතයි.
පාර්ලිමේන්තු කටයුතු පිළිබඳ කාරක සභාවේදී තීරණය කර ඇත්තේ අද දින විවාදයට ගැනීමට නියමිතව තිබූ සත්ත්ව සුබසාධන පනත් කෙටුම්පත ඉදිරි දිනකදී විවාදයට ගැනීමටයි.
ඒ අනුව ආණ්ඩුක්‍රම ව්‍යවස්ථාව සහ සෙසු අදාළ නීති මගින් දක්වා ඇති විධානවලට අනුකූලව 2024 සැප්තැම්බර් 17 සිට ඔක්තොම්බර් 16 දක්වා වූ කාල පරිච්ඡේදය තුළ ජනාධිපතිවරණය පැවැත්වීම පිළිබඳව ගෙන එනු ලැබූ යෝජනාවට අනුවයි මෙම සභාව කල්තැබීමේ විවාදය පැවැත්වීමට නියමිතව ඇත්තේ.
ජාතික ජනබලවේගයේ නායක, පාර්ලිමේන්තු මන්ත්‍රී අනුර කුමාර දිසානායක සහ විපක්ෂයේ ප්‍රධාන සංවිධායක, පාර්ලිමේන්තු මන්ත්‍රී ලක්ෂ්මන් කිරිඇල්ල විසින් ඒකාබද්ධව මෙම යෝජනාව ඉදිරිපත් කර තිබෙනවා.
මේ අනුව අද දින වාචික පිළිතුරු අපේක්ෂා කරන ප්‍රශ්නවලින් අනතුරුව පෙරවරු 10.30 සිට පස්වරු 5.30 දක්වා විවාදය පැවැත්වීමට නියමිතයි.
ජනාධිපති ධුර කාලය සම්බන්ධයෙන් ව්‍යවස්ථාවේ පවතින අනනුකූලතාවයන් සහ සැක දුරු කිරීම සඳහා “ආණ්ඩුක්‍රම ව්‍යාවස්ථා සංශෝධන පනත් කෙටුම්පතක්” සකස් කිරීමටද මේ වන විටත් කැබිනට් අනුමැතිය හිමිව තිබෙනවා.
