අතීතයේ ප්‍රධාන වෙළෙඳ සහ ආර්ථික මධ්‍යස්ථානයක්ව පැවති අනුරාධපුරය නැවත ලෝක ප්‍රසිද්ධ නගරයක් බවට පත් කිරීමට අවශ්‍ය වැඩපිළිවෙළ ක්‍රියාත්මක කරන බව ජනාධිපති රනිල් වික්‍රමසිංහ මහතා පවසනවා.
ඓතිහාසික ජය ශ්‍රී මහා බෝධින් වහන්සේ සහ අටමස්ථානයේ සංවර්ධන කටයුතු සදහා ඉදිරියේදීද රජයේ සහාය ලබාදෙන බවයි ජනාධිපතිවරයා පැවසුවේ.
ඓතිහාසික ජය ශ්‍රී මහා බෝධි පරිශ්‍රයේ ස්ථාපිත කරන ලද කිලෝවොට් 150 ක ධාරිතාවකින් යුත් සූර්යබල විදුලි පද්ධතිය සසුනට පූජා කිරීමේ උත්සවයට එක්වෙමින් ජනාධිපති රනිල් වික්‍රමසිංහ මහතා මෙම අදහස් පළ කළා.
අනුරාධපුර නගරයේ පුරාවිද්‍යාත්මක පර්යේෂණ කටයුතු ආරම්භ කිරීමට යුනෙස්කෝ සංවිධානයේ අධ්‍යක්ෂ ජනරාල්වරිය සමඟ සාකච්ඡා කරන බවද ජනාධිපතිවරයා එහිදි වැඩිදුරටත් කියාසිටියා.
අනුරාධපුර පුදබිම වෙත පැමිණි ජනාධිපති රනිල් වික්‍රමසිංහ මහතා අද පෙරවරුවේ අටමස්ථානාධිපති අතිපූජ්‍ය පල්ලේගම හේමරතන නාහිමියන් බැහැ දැක කෙටි පිළිසඳරක නිරත වූ බවයි ජනාධිපති මාධ්‍ය අංශය පැවසුවේ.
අනතුරුව ඓතිහාසික ජය ශ්‍රී මහා බෝධීන් වහන්සේ වැඳ පුදාගෙන ආශිර්වාද ලබා ගත් ජනාධිපතිවරයා සූර්යබල විදුලි පද්ධතිය විවෘත කිරීමේ අවස්ථාවට එක් වුණා.
මේ අතර අනුරාධපුර පුද බිම වෙත පැමිණ සිටි ජනතාව අතරට ද ගිය ජනාධිපතිවරයා ඔවුන්ගේ තොරතුරු විමසමින් සුහද කථා බහකද නිරත වූ බවයි ජනාධිපති මාධ්‍ය අංශය පැවසුවේ.
මෙම අවස්ථාවට පාර්ලිමේන්තු මන්ත්‍රීවරුන් වන එස්.එම්.චන්ද්‍රසේන , දුමින්ද දිසානායක, හිටපු අමාත්‍ය පී.හැරිසන් , හිටපු ප්‍රධාන අමාත්‍ය එස්.එම්.රංජිත් ද එක්ව තිබෙනවා.
