Friday, April 4, 2025

General line - 0115112241

නිවිතිගල, දීගානකන්ද ප්‍රදේශයේ තරුණයෙකු ඝාතන සිද්ධියට අදාල සැකකරුවන් තුනක් අත්අඩංගුවට



නිවිතිගල, දීගානකන්ද ප්‍රදේශයේදී තරුණයෙකු ඝාතනයට ලකවීමේ සිද්ධියට සම්බන්ධ සැකකරුවන් තුන් දෙනෙකු අත්අඩංගුවට ගෙන තිබෙනවා.

ඒ, රත්නපුර කොට්ඨාස අපරාධ විමර්ශන කාර්යංශයේ නිලධාරින් විසින්.

පසුගිය අප්‍රේල් 13 වනදා නිවසින් පිටව ගිය තරුණයා යළි නිවසට පැමිණ නැහැ.

ඔහුගේ මෘත දේහය පසුගිය අප්‍රේල් 16 වනදා නිරිඇල්ල ගඟෙහි තිබී හමුවී තිබෙනවා.

එම මරණය සැක සහිත බවට තරුණයාගේ පියා විසින් නිවිතිගල පොලිස් ස්ථානයට පැමිණිලි කර ඇති බවයි වාර්තා වුණේ.

කෙසේවෙතත් එම විමර්ශනවලින් තමන්ට සාධාරණයක් ඉටු නොවුණු බවට එම තරුණයාගේ පියා විසින් සබරගමුව පළාත් ජ්‍යෙෂ්ඨ නියෝජ්‍ය පොලිස්පතිවරයා වෙත පැමිණිලි කර තිබුණා.

ඒ අනුව ජ්‍යෙෂ්ඨ නියෝජ්‍ය පොලිස්පතිවරයා විසින් එම විමර්ශන කටයුතු භාර කෙරුණේ රත්නපුර කොට්ඨාස අපරාධ විමර්ශන කාර්යංශය වෙතයි.

ඒ අනුව විමර්ශන ආරම්භ කළ එම කාර්යංශය හෙළි කරගෙන ඇත්තේ අදාළ තරුණයාට තියුණු ආයුධයකින් පහර දී නිරිඇල්ල ගඟට දමා ඇති බවයි.

එම පහර දීමට යොදාගත් තියුණු ආයුධය ද පොලිසිය විසින් සොයාගෙන තිබෙනවා.

අදාළ සිද්ධිය සම්බන්ධයෙන් අත්අඩංගුවට ගෙන ඇත්තේ  දීගානකන්ද සහ කරවිට ප්‍රදේශවල පදිංචිකරුවන් තිදෙනෙක්.

පෙර පැවති අමනාපකදම් හේතුවෙන් අදාළ තරුණයාට පහර දී නිරිඇල්ල ගඟට දමා ඇති බවටයි විමර්ශනවලදී හෙළි වී ඇත්තේ.

සැකකරුවන් රත්නපුර මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලබන 16 වනදා දක්වා රක්ෂිත බන්ධනාගාර ගතකර තිබෙනවා.