2025 වසර සඳහා වන විසර්ජන පනත් කෙටුම්පත දෙවනවර කියවීම හෙවත් අයවැය කථාව පාර්ලිමේන්තුවට ඉදිරිපත් කිරීම මේ වන විට සිදුවනවා.
ඒ, මුදල් අමාත්‍යවරයා ලෙස ජනාධිපති අනුර කුමාර දිසානායක මහතා විසින්. අද පෙරවරු 10.30ට කථානායකවරයාගේ ප්‍රධානත්වයෙන් පාර්ලිමේන්තුව රැස්වීමෙන් අනතුරුව පෙරවරු 10.34ට පමණ ජනාධිපතිවරයා සිය අයවැය කථාව ඉදිරිපත් කිරීම ආරම්භ කළා.
සිය අයවැය කථාව ඉදිරිපත් කරමින් ජනාධිපතිවරයා කියා සිටියේ ජනතාවගේ ආර්ථික අයිතිවාසිකම් තහවුරු කිරීම මෙවර අයවැයේ දර්ශනය වන බවයි.
මෙවර අයවැයෙන් ප්‍රාග්ධන වියදම් සඳහා දළ දේශීය නිෂ්පාදිතයෙන් සියයට 4ක් වෙන්කර ඇති බවද ජනාධිපතිවරයා කියා සිටියා.
ජ්‍යෙෂ්ඨ පුරවැසියන්ගේ පොලිී සහනධාරය ජූලි මාසයේ සිට ලබාදීමට කටයුතු කරන බවද මෙහිදී ප්‍රකාශ කෙරුණා.
මෙම වසරේ සියයට 5ක ආර්ථික වර්ධනයක් ලබා ගැනීමට අපේක්ෂා කරන බවයි ජනාධිපතිවරයා සිය අයවැය කථාවේදී කියා සිටියේ.
නව රේගු පනතක් ගෙන ඒමට සහ ආර්ථික පරිවර්තන පනත සංශෝධනය කිරීමට පියවර ගන්නා බවද ජනාධිපතිවරයා කියා සිටියා.
මෙම වසර තුළ පාර්ලිමේන්තු මන්ත්‍රීවරුන්ට වාහන බලපත්‍ර හෝ වාහන ලබාදීමට මුදල් වෙන්කර නොමැති බවයි ජනාධිපතිවරයා මෙහිදී සඳහන් කළේ.
පවතින පාසල් පද්ධතියට සමාලෝචනය කර යළි ස්ථානගත කිරීම සඳහා රුපියල් මිලියන 500ක මුදලක් අයවැයෙන් වෙන් කිරීමට යෝජනා කර තිබෙනවා.
ජනාධිපති අනුර කුමාර දිසානයක මහතා සිය අයවැය කථාව මේ වන විටත් පාර්ලිමේන්තුවට ඉදිරිපත් කරමින් සිටිනවා.
ඒ පිළිබඳ තවත් තොරතුරු අපගේ ඉදිරි ප්‍රවෘත්ති විකාශ තුළින් බලාපොරොත්තු වන්න.
