පාසැල් දරුවන් සහ ශ්‍රී ලංගම වාර ප්‍රවේශපත්‍ර ඇති පුරවැසියන් මඟහැර ධාවනය වන ශ්‍රී ලංගම බස්රථ රියදුරන් සම්බන්ධයෙන්, ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍යංශයීය උපදේශක කාරක සභාවේදී සාකච්ඡාවට ලක්ව තිබෙනවා.
එහිදී විෂය භාර අමාත්‍ය බිමල් රත්නායක මහතා ප්‍රකාශ කර ඇත්තේ ඕනෑම පුරවැසියෙකුට මේ සම්බන්ධයෙන් 1958 අංකයට දැනුම්දීමක් කළ හැකි බවයි.
මේ පිළිබඳව තමා දැනුවත් බවත්, මෙවැනි අකටයුතු සම්බන්ධයෙන් දැඩි ක්‍රියාමාර්ග ගැනීමට පසුබට නොවන වන බවත්, මේ පිළිබඳව ලංගම රියදුරන් සහ කොන්දොස්තරවරුන් දැනුවත් කර ඇති බවත් අමාත්‍යවරයා එහිදී ප්‍රකාශ කර තිබෙනවා.
එහිදී වැඩිදුරටත් අදහස් දැක්වූ අමාත්‍යවරයා ප්‍රකාශ කර ඇත්තේ තාක්ෂණය පවා තිබියදී වන අලින්ට සිදුවන හානිය සම්බන්ධයෙන් ක්‍රියාත්මක වීමට දුම්රිය දෙපාර්තමේන්තු නිලධාරීන්ගේ උනන්දුවක් නොමැති වීම පිළිබඳව කණගාටු වන බවයි.
මීනගයා දුම්රිය අනතුරින් මියගිය වන අලින් 06 දෙනා සම්බන්ධ සිදුවීම ඉතාමත් කණගාටුදායක සිදුවීමක් බවත්, එය එසේ සිදුව තිබියදී දුම්රිය දෙපාර්තමේන්තු නිලධාරීන් තමන් සතු GPS දත්ත තාක්ෂණය මෙවන් සිදුවීම් අවම කරගැනීම සඳහා යොදා ගැනීමට කිසිදු උනන්දුවක් නොදැක්වීම පිළිබඳව සිය අප්‍රසාදය පළ කරන බවත් අමාත්‍ය බිමල් රත්නායක මහතා එහිදී ප්‍රකාශ කර තිබෙනවා.
එවැනි තත්ත්වයන් වළක්වා ගැනීමට ගත හැකි සියලු ක්‍රියාමාර්ගයන් ගන්නා ලෙසද දුම්රිය දෙපර්තෙමේන්තු නිලධාරීන්ට අමාත්‍ය බිමල් රත්නායක මහතා එහිදී උපදෙස් ලබාදී තිබෙනවා.
