ලෝක රත්තරන් මිල වාර්තාගත ලෙස ඉහළ ගොස් තිබෙනවා.
විදෙස් මාධ්‍ය වාර්තා කළේ රත්තරන් අවුන්සයක මිල අමෙරිකානු ඩොලර් 3,100 සීමාව ඉක්මවා ගොස් ඇති බවයි.
එය රත්තරන් සඳහා ලෝක වෙළඳපොලේ වාර්තා වූ ඉහළම අගයයි.
මේ වසරේ පමණක් ලෝක රත්තරන් මිල සියයට 18කින් වැඩි වී තිබෙනවා.
ඒ, අවස්ථා විස්සකදී ලෝක රත්තරන් මිල ඉහළ යමින්.
ලෝක රත්තරන් මිල මෙලෙස වාර්තාගත ලෙස ඉහළ යාමට ප්‍රධාන වශයෙන් බලපා ඇත්තේ අමෙරිකානු ජනාධිපති ඩොනල්ඩ් ට්‍රම්ප් විසින් නවතම තීරු බදු පැනවීමට ගෙන ඇති තීරණයයි.
ඒ අනුව ලෝකයේ ප්‍රධානතම මහ බැංකුව විසින් විශාල වශයෙන් රත්තරන් මිලදී ගැනීමත් සමඟ ඒ සඳහා ඉහළ ඉල්ලුමක් ද මතුව තිබෙනවා.
ට්‍රම්ප්ගේ බදු හේතුවෙන් ගෝලීය වෙළඳ යුද්ධයක් පිළිබඳ බිය ඇති වීමත් සමඟ රත්තරන් මිල මෙලෙස සීඝ්‍රයෙන් ඉහළ යමින් ඇති බවයි විදෙස් මාධ්‍ය වාර්තා කළේ.
ට්‍රම්ප්ගේ තීරු බදු හෙට දින සිට ක්‍රියාත්මක වීමට නියමිතයි.
ඒ අනුව ආනයනික මෝටර් රථ සහ සැහැල්ලු ට්‍රක් රථ සඳහා සියයට 25ක තීරු බද්දක්, වානේ සහ ඇලුමිනියම් සඳහා සියයට 25ක තීරු බද්දක් පැනවීමට නියමිතයි.
මේ අතර, මේ වන විට ලෝකයේ වැඩිම අවධානයක් යොමු වී ඇත්තේ අමෙරිකානු ජනාධිපති ඩොනල්ඩ් ට්‍රම්ප් විසින් පනවන තීරුබදු පිළිබඳවයි.
ඒ, එම තීරුබදු හේතුවෙන් ගෝලීය වෙළඳ යුද්ධයක් හටගනු ඇතැයි විචාරකයින් මත පළ කිරීමත් සමගයි.
ට්‍රම්ප් දැනටමත් චීනයෙන් ආනයනය කරන වානේ හා ඇලුමිනියම්, කැනඩාව සහ මෙක්සිකෝවෙන් ආනයනය කරන තවත් භාණ්ඩ සඳහා තීරුබදු ඉහළ නංවා ඇති අතර මෝටර් රථ සඳහා නව තීරු බදු මෙම සතියේ ක්‍රියාත්මක වීමට නියමිතයි.
ධවල මන්දිරය හඳුන්වා දී ඇත්තේ “විමුක්ති දිනය” ලෙසයි.
පසුගිය වසරේ මැතිවරණ ප්‍රචාරක රැළිවලදී ට්‍රම්ප් පැවසුවේ අමෙරිකාවට ගෙන එන සියලුම ආනයන සඳහා සියයට 10ක සමස්ත බද්දක් පනවන බවයි.
ඇතැම් විට එය සියයට 20ක් දක්වාත් චීනයෙන් ආනයනය කරන භාණ්ඩ සඳහා සියයට 60ක් විය හැකි බවටත් ප්‍රකාශ වී තිබෙනවා.
අමෙරිකාවේ නව තීරුබදු හේතුවෙන් රටවල් රැසකට ඍජු බලපෑමක් එල්ල වනු ඇති බවටයි විචාරකයින් පවසන්නේ.
ඒ අතරට ආර්ජන්ටිනාව, ඕස්ටේ්‍රලියාව, බ්‍රසීලය, කැනඩාව, චීනය, යුරෝපීය සංගමය, ඉන්දියාව, ඉන්දුනීසියාව, ජපානය, කොරියාව, මැලේසියාව, මෙක්සිකෝව, රුසියාව, සෞදි අරාබිය, දකුණු අප්‍රිකාව, ස්විට්සර්ලන්තය, තායිවානය, තායිලන්තය, තුර්කිය, එක්සත් රාජධානිය සහ වියට්නාමය ද ඇතුළත්.
