ලෝක කොටස් වෙළඳපොළ පහළට - රන් මිලත් ඉතිහාසයේ වැඩිම අගයට

අමෙරිකානු ජනාධිපති ඩොනල්ඩ් ට්‍රම්ප් විසින් සියලු රටවලට බලපාන පරිදි නව තීරුබදු පැනවීමත් සමග ලෝක ආර්ථිකය තුළ දැඩි කැළඹීමක් මතුව තිබෙනවා.

අද උදෑසනම ආසියා-පැසිෆික් කලාපයේ ප්‍රධාන කොටස් වෙළෙඳපොළ රැසක අගයන් පහළ බැසීම සිදු වුණා.

ජපානයේ සියයට 4 කින් කොටස් වෙළෙඳපොළ අගයන් පහත වැටීම විශේෂත්වයක්.

ඒ, අමෙරිකානු  ජනාධිපතිවරයා විසින් ජපානයෙන් ආනයනය කරන ලද භාණ්ඩ සඳහා සියයට 24ක තීරුබදු ප්‍රකාශ කිරීමෙන් පසුවයි.

ඔස්ටේ්‍රලියාවේද සියයට 2කින් කොටස් වෙළෙඳපොළ අගයන් පහත වැටී තිබෙනවා.

ගෝලීය වෙළඳ යුද්ධයක් මතුවීමේ බලපෑම හේතුවෙන් ලොව පුරා මේ වන විට පවතින්නේ ආර්ථික අවිනිශ්චිතතාවයක් බවයි ආර්ථික විශ්ලේෂකයින් පවසන්නේ.

එවන් තත්තවයක් තුළ ලෝක රත්තරන් මිල අද ඉතිහාසයේ ඉහළම අගය වාර්තා කළා. 2025 ආරම්භයේ සිට සියයට 14කින් ඉහළ ගිය රත්තරන් මිල මේ වන විට අවුන්සයකට ඩොලර් 3,004යි ශත 86 ක වාර්තාගත අගයක් දක්වා ඉහළ ගොස් තිබෙනවා. 

ජනාධිපති ඩොනල්ඩ් ට්‍රම්ප්ගේ තීරණයට මේ වන විට රටවල් මෙන්ම පාර්ශව රැසකින් ද විරෝධයක් එල්ල වී ඇතැයි විදෙස් මාධ්‍යයන්හි සඳහන්. 

ට්‍රම්ප්ගේ බදු පැනවීමට ප්‍රතිචාර දක්වමින් එක්සත් ජනපද නිෂ්පාදිත විස්කි ආනයනය සඳහා සියයට 50ක බද්දක් පැනවීමටයි යුරෝපා සංගමය සැලසුම් කර ඇත්තේ. 

ට්‍රම්ප්ගේ මෙම තීරණය ලෝක ආර්ථිකයට එල්ල වූ විශාල පහරක් ලෙසයි යුරෝපා සංගමය හඳුන්වා දී ඇත්තේ.

ඉතාලිය මෙම ක්‍රියාව වැරදි ක්‍රියාවක් ලෙස හඳුන්වා දී ඇති අතර මෙය මිතුරෙකුගේ ක්‍රියාවක් නොවන බවටයි ඕස්ටේ්‍රලියාව පවසා ඇත්තේ. මෙය තීරුබදු තර්ජනයක් ලෙස හඳුන්වා දී ඇති චීනය ට්‍රම්ගේ ක්‍රියා කලාපය හෙළා දැක තිබෙනවා. 

ස්වීඩන් අග්‍රාමාත්‍ය උල්ෆ් ක්‍රිස්ටර්සන් පවසා ඇත්තේ තම රටට වෙළඳ යුද්ධයක් අවශ්‍ය නොවන බවයි.

ගෝලීය වෙළඳ යුද්ධය යථාර්ථයක් වී ඇති බැවින්, වෙළඳ අර්බුදය ජය ගැනීම සඳහා රජය සිය සියලු හැකියාවන් යෙදවිය යුතු බවයි දකුණු කොරියානු වැඩබලන ජනාධිපති හැන් ඩක්-සූ පවසා ඇත්තේ.

කොලොම්බියානු විදේශ අමාත්‍ය ලෝරා සරබියා පවසන්නේ ජාතික කර්මාන්තය සහ සිය අපනයනකරුවන් ආරක්ෂා කිරීම සඳහා පියවර ගන්නා බවයි.