ඩෙල්ටා කොවිඩ් වෛරස ප්‍රභේදය ආසාදනය වූ බවට සැකකරෙන පුද්ගලයෙකු මාදිවෙල, ප්‍රගතිපුර ප්‍රදේශයෙන් වාර්තා වී ඇති බැවින් අදාළ ප්‍රදේශයේ රෝග ව්‍යාප්තිය පාලනය කිරීමට අවශ්‍ය කටයුතු සිදුකරමින් පවතින බව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් පවසනවා.
" මෙම ප්‍රදේශයේ සිදුකළ PCR පරීක්ෂණයෙන් අදාළ රෝගියාගේ ජෛව සාම්පල් පරීක්ෂණයේ යම් වෙනසක් තිබෙන බවට පර්යේෂණාගාරය මගින් දැනුවත් කිරීමක් සිදුකර තිබෙනවා. ඒ අනුව රෝග ව්‍යාප්තිය පාලනය කිරීම සඳහා මේ වන විටත් අප අවශ්‍ය කටයුතු සිදුකරගෙන යනවා.
පසුගියදා දෙමටගොඩ, ආරාමය ප්‍රදේශයෙන් ඩෙල්ටා ප්‍රභේදය ආසාදනය වූ පුද්ගලයින් වාර්තා වීමත් සමග සෞඛ්‍ය අංශ විසින් මෙවැනිම ක්‍රියා මාර්ග ගනු ලැබුවා. ඒ වගේම අදාළ පුද්ගලයාගේ සාම්පල් වැඩිදුර පරීක්ෂණ සඳහා යොමු කර තිබෙනවා" යැයි නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් ප්‍රකාශ කර සිටියා.
මෙරට සමාජයෙන් පළමුවරට ඩෙල්ටා ප්‍රභේදය ආසාදිත වූ පුද්ගලයින් හදුනා ගැණුනේ දෙමටගොඩ ආරාමය ප්‍රදේශයෙන්. එහිදී එම ප්‍රභේදය ආසාදනය වූ පුද්ගලයින් පස් දෙනෙකු හදුනා ගැණුනා. මේ වනවිට එම ප්‍රදේශයේ වතු කිහිපයක් හුදකලා කර ඇති අතර ඉදිරි දින 11 තුළදී එම ප්‍රදේශයේ ජනතාව සදහා යළිත් පී සී ආර් හෝ රැපිඩ් ඇන්ටිජන් පරීක්‍ෂාවක් සිදුකරන බවයි සෞඛ්‍ය අංශ පැවසුවේ.
මේ, ඒ සම්බන්ධයෙන් කරුණු දැක්වූ කොළඹ මහ නගර සභාවේ ප්‍රධාන සෞඛ්‍ය වෛද්‍ය නිලධාරී වෛද්‍ය රුවන් විජයමුණි.
