ඉතිහාසයේ ලද දරුණුම පරාජයෙන් එංගලන්තය, ශ්‍රී ලංකාවටත් වඩා පහලට වැටෙයි

වත්මන් එක්දින ක්‍රිකට් ලෝක ශුර එංගලන්ත කණ්ඩායමේ මෙවර ලෝක කුසලාන ගමන අවදානමකට ඇද වැටී තිබෙනවා.

ඒ, මෙවර ලෝක කුසලාන ක්‍රිකට් තරගාවලියේ දකුණු අප්‍රිකාව සමග ඊයේ රාත්‍රියේ පැවති තරගයෙන් වාර්තා ගත පරාජයක් ලැබීමත් සමගයි.

තරගයේ ප්‍රථමයෙන් පන්දුවට පහර දුන් දකුණු අප්‍රිකාව කඩුලු 07කට ලකුණු 399ක් රැස් කලා.

එය මෙවර ලෝක කුසලානයේ කණ්ඩායමක් රැස් කල දෙවන වැඩිම ලකුණු සංඛ්‍යාවයි. එමෙන්ම, එංගලන්තයට එරෙහිව කිසියම් කණ්ඩායමක් එක්දින තරගයක වාර්තා කල ඉහලම ලකුණු සංඛ්‍යාවද මෙය වුණා. 

දකුණු අප්‍රිකානු ඉනිමේ කඩුලු 05ක් ලකුණු 243ක් තුල බිද වැටී තිබූ අවස්ථාවේ පිටියේ එක් වූ හෙන්ඩ්‍රික් ක්ලාසන් පන්දු 67කදී ලකුණු 109ක් රැස් කලේ හයේ පහර 04ක් හා හතරේ පහර 12ක් සමගයි. මාර්කෝ ජෙන්සන් පන්දු 42කදී හයේ පහර 06ක් හා හතරේ පහර 03ක් සමග නොදැවී රැස් කල ලකුණු සංඛ්‍යාව 75ක්.

ඔවුන් දෙදෙනා අතර හයවන කඩුල්ලට ලකුණු 151ක සබදතාවක් ගොඩ නැගුණු අතර එය දකුණු අප්‍රිකානු එක්දින ක්‍රිකට් ඉතිහාසයේ 06වන කඩුල්ලට බිහි වූ ඉහලම ලකුණු සබදතාවයි.

ලකුණු 400ක ඉලක්කයක් හඹා යාමට පිටියට පිවිසි එංගලන්ත ඉනිමේ පළමු පිතිකරුවන් තිදෙනාටම රැස් කර ගත හැකි වූයේ ලකුණු 18ක් පමණයි.

එය 1975 වසරෙන් පසු එක්දින තරගයක එංගලන්ත ඉනිමේ පළමු පිතිකරුවන් තිදෙනා රැස් කල අඩුම ලකුණු සංඛ්‍යාවයි.

ඉන් පසුවත් එංගලන්ත පිතිකරුවන්ට සාර්ථක වීමට ඉඩ නොදුන් දකුණු අප්‍රිකානු පන්දු යවන්නන් එංගලන්ත ඉනිම ලකුණු 170කට සීමා කලා.

ඒ අනුව දකුණු අප්‍රිකාව මෙම තරගය ජය ගත්තේ ලකුණු 229කින්. එය එංගලන්ත කණ්ඩායමක් එක්දින පිටියේ ලද දරුණුම පරාජයයි. 

එංගලන්ත කණ්ඩායමේ මෙම පරාජයත් සමඟ ඔවුන්ගේ ලෝක කුසලාන ගමන දැන් පවතින්නේ දැඩි අවධානමකයි.

ඔවුන් මේ දක්වා සහභාගී වූ තරග 4න් ජය ගෙන ඇත්තේ එක් තරගයක් පමණයි. එමෙන්ම ඔවුන්ගේ දල ලකුණු වේගය ද ඇත්තේ සෘණ මට්ටමකයි.

තරගය අවසානයේ ප්‍රකාශයට පත්කල නවතම ප්‍රසාද ලකුණු සටහනට අනුව එංගලන්තය පසුවන්නේ ශ්‍රී ලංකාවටත් වඩා පහලින්.

ශ්‍රී ලංකාව අටවන ස්ථානයේත්, එංගලන්තය නමවන ස්ථානයේත් පසුවනවා.

ඔවුන්ගේ ප්‍රසාද ලකුණු සංඛ්‍යාවද ඉදිරියෙන් ඇත්තේ අවසන් ස්ථානයේ සිටින ඇෆ්ගනිස්ථානයට පමණයි.