එක්දින ලෝක කුසලාන ක්‍රිකට් තරගාවලිය පළමු වරට දැන් අතිශය තීරණාත්මක අදියරකට පත්ව තිබෙනවා.
ඒ අනුව දැන් කිසියම් කණ්ඩායමක ජය මෙන්ම පරාජයද තවත් කණ්ඩායම් කිහිපයකම ලෝක කුසලානයේ ඉදිරි ගමනට බලපානු ඇති.
නවසීලන්තය පරාජය කරමින් ඕස්ට්‍රේලියාව ඊයේ ලැබූ තියුණු ජය හේතුවෙන් දැන් තරගාවලිය විවෘත වී තිබෙනවා.
දකුණු අප්‍රිකාව හා ඉන්දියාව දැන් සිටින්නේ ආරක්ෂිත ස්ථානයකයි.
එහෙත් නවසීලන්ත පරාජයෙන් ශ්‍රී ලංකා කණ්ඩායමද අවධානමේ වැටී තිබෙනවා.
එමෙන්ම, මෙතෙක් දක්ෂතා දක්වමින් සිටි නවසීලන්තයටද අතිරේක පීඩනයක් එල්ල වීම කැපී පෙනෙන තත්ත්වයක්.
අද පැවැත්වෙන ඉන්දියා - එංගලන්ත තරගයෙන් යම් හෙයකින් ඉන්දියාව ජය ගත හොත් එංගලන්තය තරගාවලියෙන් ඉවතට විසිවනවා.
එංගලන්තය ජය ගත හොත් ඔවුන්ට තවදුරටත් ලෝක කුසලානය කෙරෙහි යම් බලාපොරොත්තුවක් හෝ තබාගත හැකියි.
ශ්‍රී ලංකා පිල ඇෆ්ගනිස්ථානය හා බංග්ලාදේශය පරාජය කර විශේෂයෙන් නවසීලන්තය පරාජය කල හොත් සුපිරි කණ්ඩායම් 04 අතරට පිවිසීමට අවස්ථාවක් උදාකර ගැනීමට හැකිවනු ඇති.
ඊයේ පැවති තරගයෙන් බංග්ලාදේශය පරාජය වීම හේතුවෙන් ඔවුන්ට බොහෝ දුරට තරගාවලියෙන් ඉවත් වීමට සිදු වනවා.
තරගය ජය ගත් නෙදර්ලන්තයට තරගාවලියේ ඉදිරිය පිලිබද දැන් තවත් බලාපොරොත්තුවක් තබා ගත හැකියි.
දැන් පවතින තත්ත්වය අනුව ශ්‍රී ලංකාව ඇතුලු කණ්ඩායම් කිහිපයකට ප්‍රසාද ලකුණු 10ක් ලබා ගත හැකි තත්ත්වයක් නිර්මාණය වී තිබෙනවා.
ඒ අනුව දල ලකුණු වේගය මත කණ්ඩායම් කිහිපයකම අනාගතය රැදෙනු ඇති. එහිදී ලබන සතිය මෙවර ලෝක කුසලානයේ උණුසුම්ම සතිය වනු නොඅනුමානයි.
මේ අතර, ඊයේ රාත්‍රියේ පැවති තරගයෙන් බංග්ලාදේශය පරාජයට පත්කරමින් නෙදර්ලන්තය පෙරලිකාර ජයක් වාර්තා කලා.
තරගයේ ප්‍රථමයෙන් පන්දුවට පහර දුන් නෙදර්ලන්තය සියලු දෙනා දැවී රැස්කලේ ලකුණු 229ක් පමණයි.
එහෙත් බංග්ලාදේශයේ සියලු දෙනා ලකුණු 142කට දැවී ගිය අතර නෙදර්ලන්තය මෙම තරගය ජය ගත්තේ ලකුණු 87කින්.
මෙම ජයග්‍රහණයත් සමග ප්‍රසාද ලකුණු 04ක් සමග නෙදර්ලන්තය 08 වන ස්ථානයට ගියේ ලෝක ශූර එංගලන්තය අවසන් ස්ථානයට ඇද දමමින්.
