වාහන මිල අඩු කිරීමටත් ජනපති සමග සාකච්ඡාවක්

පෞද්ගලික පරිහරණය සඳහා වන වාහන ආනයනය කිරීම සඳහා අවශ්‍ය කටයුතු සූදානම් කර ඇතැයි වාහන ආනයනකරුවන් පවසනවා.

ලංකා වාහන ආනයනකරුවන්ගේ සංගමයේ සභාපති සම්පත් මෙරෙංචිගේ මහතා පැවසුවේ දැනටමත් කාණ්ඩ 03කට අදාළ වාහන ආනයනය කිරීමේ කටයුතු මේ වන විටත් ආරම්භ කර ඇති බවයි.

වාහන ආනයනය මෙන්ම වාහන මිල සම්බන්ධයෙන්ද ඉදිරියේදී ජනාධිපතිවරයා සමග සාකච්ඡා කරන බවයි ඔහු සඳහන් කළේ.

ජනාධිපති අනුර කුමාර දිසානායක මහතා පාර්ලිමේන්තුවේදී ඊයේ පැවසුවේ වාහන ආනයනය කිරීම සඳහා ඩොලර් සොයා ගැනීම පිළිබඳව ශ්‍රී ලංකා මහබැංකුව සමග දීර්ඝ සාකච්ඡාවක නිරත වූ බවයි.

2025 වර්ෂයේ පෙබරවාරි 01 සිට පෞද්ගලික පරිහරණය සඳහා වාහන ආනයනයට අවස්ථාව ලබා දීමටයි රජය සැලසුම් කර ඇත්තේ.

මගී ප්‍රවාහන බස් සහ විශේෂ කාර්යයන් සඳහා භාවිත කරන වාහන ගෙන්වීමට ඉකුත් 14 සිට විවෘත කර තිබෙනවා.