සේරුනුවර - කන්තලේ මාර්ගයේ, කල්ලාර් යුද හමුදා කඳවුර ඉදිරිපිට වංගුව අසල අද අලුයම සිදු වූ රිය අනතුරකින් පුද්ගලයින් 14 දෙනෙකු තුවාල ලබා තිබෙනවා.
පොලිසිය පැවසුවේ කාත්තන්කුඩිය දෙස සිට කොළඹ දෙසට ධාවනය වූ මගී ප්‍රවාහන බස් රථයක් මාර්ගයෙන් ඉවතට පැන ගසක ගැටී එම බස් රථය පෙරලී අනතුර සිදුව ඇති බවයි.
අනතුර සිදුවන අවස්ථාවේ බස් රථයේ මගීන් 49 දෙනෙකු පමණ ගමන් කර තිබෙනවා.
අනතුරෙන් බස් රථ රියදුරා, රිය සහායක ඇතුළු 14 දෙනෙකු තුවාල ලබා ඇති බවයි පොලිසිය පැවසුවේ.
ඔවුන් සේරුනුවර රෝහලට ඇතුළත් කිරීමෙන් අනතුරුව බස් රථ රියදුරා සහ මගීන් 09 දෙනෙකු වැඩිදුර ප්‍රතිකාර සඳහා ත්‍රිකුණාමල රෝහලට මාරු කර තිබෙනවා.
