තමිල්නාඩු මහ ඇමැතිනී ජයලලිතා ජයරාම්ගේ දේහය පිළිබඳ අවසන් කටයුතු අද (06) පස්වරුවේ චෙන්නායි හි මරීනා වෙරළ තීරය ආසන්නයේදී සිදු කෙරුණා.
ආචාර වෙඩිමුර මැද රැස්ව සිටි ලක්ෂ සංඛ්‍යාත පිරිසකගේ සෝ සුසුම් මධ්‍යයේ එම කටයුතු සිදු වුණා.
ජයලලිතාගේ දේහය පිළිබඳ අවසන් කටයුතු ඇරඹෙයි
(Dec 6, 2016 @ 17:13)
අභාවප‍්‍රාප්ත තමිල්නාඩු හිටපු මහඇමතිනී ජයලලිතා ජයරාම්ගේ දේහය පිළිබඳ අවසන් කටයුතු මේ වන විට ආරම්භ වී තිබෙනවා.
වීදුරු පෙට්ටියක තැන්පත් කර ඇති ඇගේ දේහය, අවසන් කටයුතු සිදු කෙරන ස්ථානය වෙත රැගෙන යමින් සිටිනවා.
දේහය රැගෙන ආ මාර්ගය දෙපසට රැස්වූ ලක්ෂ සංඛ්‍යාත පිරිසක් ජයලලිතාට අවසන් ගෞරව දැක්වන ආකාරය ඉන්දීය මාධ්‍ය වාර්තා කරනවා.
අවසන් කටයුතු පැවත්වෙන ස්ථානය අවට දැඩි පොලිස් රැකවල් යොදා ඇති බවයි ඉන්දීය මාධ්‍ය වාර්තා කළේ.
අභාවප‍්‍රාප්ත තමිල්නාඩු හිටපු මහඇමතිනී ජයලලිතා ජයරාම් වෙනුවෙන් තමිල්නාඩු ප‍්‍රාන්තයේ දින 7ක ශෝක කාලයක් ප්රකාශයට පත් කර තිබෙනවා.
තමිල්නාඩුවේ පාසල් ඇතුළු අධ්‍යාපන ආයතන දින 3ක කාලයකට වසා දැමුණා. රජයේ කාර්යාලයද වසා දමා ඇත්තේ ඇයට අවසන් ගෞරව දැක්වීමේ අරමුණින්. අද දවස පුරා තමිල්නාඩු දේශපාලනඥයින්, දමිල සිනමා තරු ඇතුළු විශාල පිරිසක් ඇයගේ දේහයට අවසන් ගෞරව දැක්වූවා.
