ඉලක්කගත රථ වාහන වැරදි කිහිපයක් සම්බන්ධයෙන් ඉකුත් දින කිහිපයේ සිදුකළ මෙහෙයුම්වලදී පුද්ගලයන් 9130 කට එරෙහිව නීතිය කි‍්‍රයාත්මක කළ බව පොලීසිය පවසනවා.
නිවේදනයක් නිකුත් කරමින් පොලිස් මාධ්‍ය ප‍්‍රකාශක නියෝජ්‍ය පොලිස්පති පි‍්‍රයන්ත ජයකොඩි සඳහන් කළේ ඉකුත් 12 වැනිදා සිට 16 වැනිදා දක්වා වූ දින 5 ක කාලය තුළ මෙම මෙහෙයුම් සිදුකළ බවයි.
මෙහිදී කොළඹ නාගරික සීමාව තුළ සහ ප‍්‍රධාන මාර්ග ආශි‍්‍රතව මෙහෙයුම සිදු කෙරුණා. එහිදි බීමතින් රිය පැදවූ පුද්ගලයන් 34 දෙනෙකුට සහ මංතීරු නීතිය උල්ලංඝණය කළ රියදුරන් 7456 කට එරෙහිව නීතිය කි‍්‍රයාත්මක කළ බවයි පොලීසිය පැවසුවේ.
අපරික්‍ෂාකාරී ලෙස රිය ධාවනය කළ 26 දෙනෙකුටද නීතිය කි‍්‍රයාත්මක කර තිබෙනවා. මාර්ග අවහිර වන සේ වාහන නවතා තැබූ අටසිය හතලිස් පස් දෙනෙකුට සහ වෙනත් වැරදි සම්බන්ධයෙන් රියදුරන් 769 කට නීතිය කි‍්‍රයාත්මක කෙරුණා.
ඉදිරියේදීද මෙවැනි විශේෂ රථ වාහන මෙහෙයුම් දිවයින පුරා කි‍්‍රයාත්මක කරන බවයි පොලිස් මාධ්‍ය ප‍්‍රකාශකවරයා නිකුත් කළ නිවේදනයේ වැඩිදුරටත් දැක්වෙන්නේ.
