සති කිහිපයක සිට කතාබහට ලක්වූ කැබිනට් සංශෝධනය අද (25) සිදු කිරීමට නියමිතයි. ඒ අනුව නව කැබිනට් මණ්ඩලය අද පෙරවරු 11.00ට ජනාධිපති ලේකම් කාර්යාලයේදී දිවුරුම් දෙනු ඇති.
මෙම කැබිනට් සංශෝධනයේ දී කැබිනට් අමාත්‍ය, කැබිනට් නොවන අමාත්‍ය, රාජ්‍ය අමාත්‍ය සහ නියෝජ්‍ය අමාත්‍ය ලෙස කාණ්ඩ 04කින් අමාත්‍ය සහ නියෝජ්‍ය අමාත්‍යවරුන් දිවුරුම් දෙනු ඇතැයි දේශපාලන ආරංචි කියා සිටියා.
ඉකුත් දිනවල දී දීර්ඝ ලෙස කතා බහට ලක්වූ නීතිය හා සාමය පිළිබඳ අමාත්‍යංශය අග‍්‍රාමාත්‍යවරයා යටතේ පවත්වා ගැනීමට කටයුතු කෙරෙනු ඇති බවයි වාර්තා වන්නේ.
එක්සත් ජාතික පක්ෂය මුලින් යෝජනා කළේ මෙම අමාත්‍යංශය ෆීල්ඞ් මාර්ෂල් සරත් ෆොන්සේකාට ලබාදීමටයි. එහෙත් ශ‍්‍රී ලංකා නිදහස් පක්ෂයේ ජ්‍යෙෂ්ඨයින් කිහිපදෙනෙකු ඊට විරෝධය පල කළා.
මේ දක්වා නීතිය හා සාමය පිළිබඳ අමාත්‍යවරයා ලෙස කටයුතු කරන්නේ සාගල රත්නායකයි. අද සිදු කෙරෙන කැබිනට් සංශෝධනයේ දී ඔහුට සංචාරක අමාත්‍යංශය හිමි වනු ඇති බවයි වාර්තා වන්නේ.
මේ අතර මෙම සංශෝධනයේදී කෘෂිකර්ම අමාත්‍යංශය, අමාත්‍ය අනුර ප‍්‍රියදර්ශන යාපා වෙත පැවරෙනු ඇතැයිද ඔහු විසින් මෙතෙක් කටයුතු කළ ආපදා කළමනාකරණ අමාත්‍යංශය අමාත්‍ය දුමින්ද දිසානායකට පැවරෙනු ඇතැයි ද සඳහන්.
අමාත්‍ය ලක්ෂ්මන් කිරිඇල්ල යටතේ ඇති උසස් අධ්‍යාපන අමාත්‍යංශය වෙනත් අයෙකුට පැවරෙනු ඇතැයි ද අමාත්‍ය කබීර් හෂීම් යටතේ ඇති රාජ්‍ය ව්‍යවසාය සංවර්ධන අමාත්‍යංශයට අනුයුක්ත ආයතන වෙනස් වනු ඇතැයි ද වාර්තා වනවා.
මීට අමතරව එස්. බී. දිසානායක, මලික් සමරවික‍්‍රම, දයාසිරි ජයසේකර හා හරීන් ප‍්‍රනාන්දු යන අමාත්‍යවරුන්ගේ විෂයන් ද වෙනස් වනු ඇති බවටයි වාර්තා පළ වන්නේ.
තිලක් මාරපන අමාත්‍යවරයා යටතේ ඇති විදේශ අමාත්‍යංශය වෙනත් අයෙකුට පැවරෙනු ඇතැයි ද සඳහන්. ගාමිණි ජයවික‍්‍රම පෙරේරා අමාත්‍යවරයාගෙන් වනජීවි අමාත්‍යංශය ඉවත් කිරීමට ද යෝජනා වී තිබෙනවා.
මේ අතර ආචාර්ය හර්ෂ ද සිල්වා, එරාන් වික‍්‍රමරත්න, අජිත් පී. පෙරේරා, සුජීව සේනසිංහ හා රවීන්ද්‍ර සමරවීර යන අයට කැබිනට් නොවන අමාත්‍ය ධුර ලැබෙනු ඇති බවයි දේශපාලන ආරංචි මාර්ග කියා සිටියේ.
ශ‍්‍රී ලංකා නිදහස් පක්ෂයේ කිහිපදෙනෙකුට ද එලෙස කැබිනට් නොවන අමාත්‍ය ධුර ලැබෙනු ඇතැයි වාර්තා වනවා. බුද්ධික පතිරණ, නලීන් බණ්ඩාර සහ ලකී ජයවර්ධන යන මන්ත‍්‍රීවරුන්ට නියෝජ්‍ය අමාත්‍ය ධුර ලැබෙනු ඇතැයි ද සඳහන්.
ඉකුත් සමයේ අමාත්‍ය ධූරයෙන් ඉවත් කෙරුණු පාර්ලිමේන්තු මන්තී‍්‍ර රවී කරුණානායකට මෙවර කැබිනට් සංශෝධනයේදී ද අමාත්‍ය ධූරයක් හිමි නොවනු ඇති බවයි වාර්තා වන්නේ.
කෙසේ වෙතත් ධූරයෙන් ඉවත්වූ හිටපු අධිකරණ හා බුද්ධ ශාසන අමාත්‍ය විජේදාස රාජපක්ෂට මෙම සංශෝධනයේදී අමාත්‍ය ධූරයක් හිිමිවනු ඇති බවට වාර්තා පළ වුණා. ඔහු ඉකුත් සතියේදී අග‍්‍රාමාත්‍යවරයා සමග රහස් සාකච්ඡාවක්ද පවත්වා ඇති බවයි දේශපාලන ආරංචි මාර්ග කියා සිටියේ.
රාජිත සේනාරත්න, පාඨලී චමිපික රණවක, වජිර අබේවර්ධන, නවීන් දිසානායක, අකිල විරාජ් කාරියවසම් සහ මහින්ද සමරසිංහ යන අමාත්‍යවරුන්ගේ අමාත්‍යංශ වෙනස් නොවනු ඇතැයි දේශපාලන ආරංචි කියා සිටියා.
