සංචාරක ඉන්දීය කණ්ඩායම සහ ශ්‍රී ලංකා කණ්ඩායම අතර දෙවන පන්දුවාර විස්සයි විස්ස තරගය කොළඹ ආර් ප්‍රේමදාස ක්‍රීඩාංගණයේදී අද පැවැත්වෙනවා. තරගය රාත්‍රී 8 ට ආරම්භවීමට නියමිතයි. දෙරට අතර පැවති පළමු පන්දුවාර විස්ස ක්‍රිකට් තරගයෙන් ලකුණු 38 ක ජයක් වාර්තා කිරීමට ඉන්දීය කණ්ඩායම සමත් වුණා.
ඒ අනුව එකට බිංදුවක් ලෙස ඉන්දීය කණ්ඩායම තරගාවලියේ පෙරමුණ ගෙන සිටිනවා. භානුක රාජපක්‍ෂගේ සහභාගිත්වය අද තරගයට ද අවිනිශ්චිත බවයි වාර්තා වන්නේ. ඒ අනුව සදීර සමරවික්‍රමට අද තරගයේදී අවස්ථාවක් හිමිවනු ඇති බවටද වාර්තා පළ වනවා.
ශ්‍රී ලංකා කණ්ඩායම අවසන් වරට ඉන්දීය කණ්ඩායමට එරෙහිව විස්සයි විස්ස තරග ජයක් වාර්තා කර ඇත්තේ 2018 වසරේදීයි. ඒ අනුව ශ්‍රී ලංකා කණ්ඩායම අද තරගයට පිවිසෙන්නේ වසර 03කට පසු ඉන්දීය කණ්ඩායමට එරෙහිව විස්සයි විස්ස තරග ජයක් වාර්තා කිරීමේ අපේක්ෂාවෙන්.
