20 යි 20 ලෝක කුසලාන තරගාවලියේ ශ්‍රී ලංකාව සහභාගී වන අවසන් තරගය අද රාත්‍රියේ පැවැත්වෙනවා.
ඒ, බටහිර ඉන්දීය කොදෙව් කණ්ඩායම සමගයි. ශ්‍රී ලංකා කණ්ඩායම මෙම තරගාවලියේ තරග 04 කට ක්‍රීඩා කර ජය ගත්තේ එක් තරගයක් පමණයි.
ඒ අනුව අවසන් පූර්ව වටයට පිවිසීමේ අවස්ථාව ශ්‍රී ලංකා කණ්ඩායමෙන් ගිලිහී ගොස් තිබෙනවා.
කෙසේවෙතත්, මෙවර තරගාවලියේදී තුන් ඉරියව්වෙන් දස්කම් දැක්වූ වනිඳු හසරංගට තවත් වාර්තාවක් පිහිටුවීමට මෙම තරගයේදී අවස්ථාව පවතිනවා.
ඒ, 20 යි 20 ලෝක කුසලාන තරගාවලියකදී වැඩිම කඩුළු දවා ගත් පන්දු යවන්නා ලෙසයි. වනිඳු හසරංග මෙවර තරගාවලියේ මේ දක්වා තරග 07 කට ක්‍රීඩා කර කඩුළු 14 ක් දවාගෙන තිබෙනවා.
අද තරගයේදී තවත් කඩුළු 02 ක් දවා ගැනීමට වනිඳු සමත්වුවහොත් 20 යි 20 ලෝක කුසලාන තරගාවලියකදී වැඩිම කඩුළු සංඛ්‍යාවක් දවාගත් පන්දු යවන්නා ලෙස ඔහු වාර්තා අතරට එක්වනු ඇති.
එම වාර්තාව දැනට සතුකර ගෙන සිටින්නේ 2012 විස්සයි - 20 ලෝක කුසලාන තරගාවලියේදී කඩුළු 15 ක් ලබාගත් ශ්‍රී ලංකා කණ්ඩායමේ හිටපු ක්‍රීඩක අජන්ත මෙන්ඩිස්.
