ඕස්ට්‍රේලියානු ඉතිහාසයේ වාර්තා වී ඇති බරපතළම දත්ත සොරකම මේ වන විට සිදුව ඇතැයි විදෙස් මාධ්‍ය අද වාර්තා කළා. ඒ අනුව ඕස්ට්‍රේලියානු ජනගහනයෙන් සියයට 40 කගේ පමණ දත්ත සොරකම් කර ඇති බවයි එහි දැක්වෙන්නේ. ඒ අනුව දත්ත සොරා ගැනීමට ලක්ව ඇති සමස්ථ සංඛ්‍යාව මිලියන 10 කට අධිකයි.
ඕස්ට්‍රේලියානු විදුලි සංදේශ ක්ෂේත්‍රයේ ප්‍රමුඛ සමාගමක් නිවේදනය කර ඇත්තේ සයිබර් ප්‍රහාරයක් මගින් සිය පාරිභෝගිකයන්ගේ පෞද්ගලික දත්ත සොරකම් කර ඇති බවයි. එම දත්ත අතරට නම්, උපන්දින, ලිපිනයන්, දුරකථන අංක, විද්‍යුත් ලිපින, විදෙස් ගමන් බලපත්‍ර සහ රියදුරු බලපත්‍ර අංකද අයත්.
කෙසේවෙතත් බැංකු ගිණුම් පිළිබඳ විස්තර හෝ බැංකු කාඩ්පත් හා ණය කාඩ්පත්වල විස්තර මෙන්ම ඒවායේ මුර පද සොරාගෙන නොමැති බව අදාළ සමාගම පවසනවා. විදෙස් ගමන් බලපත්‍ර තොරතුරු සොරා ගැනීමට ලක්ව ඇති පිරිස ලක්ෂ 28 කට අධිකයි.
විදෙස් මාධ්‍ය වාර්තා කළේ සිය පෞද්ගලික දත්ත සොරාගැනීම සම්බන්ධයෙන් මේ වනවිට එරට ජනතාව තුළ දැඩි විරෝධයක් පවතින බවයි. ඕස්ට්‍රේලියානු බලධාරීන් ජනතාවගේ පෞද්ගලික දත්ත ආරක්ෂා කිරීමට ගෙන ඇති ක්‍රියාමාර්ග පිළිබඳව ද ජනතාව සැක මතුකර ඇතැයි එම වාර්තාවල සඳහන්.
