ඉන්දුනීසියාවේ ජාවා හි කන්ජූරුහන් ක්‍රීඩාංගනයේදී පැවති පාපන්දු තරගයකින් පසු හටගත් කලහකාරී තත්ත්වයෙන් පසු මියගිය පුද්ගලයින්ගේ සංඛ්‍යාව 125ක් බව තහවුරු කර තිබෙනවා. ඒ, නැගෙනහිර ජාවා හි නියෝජ්‍ය ආණ්ඩුකාරවරයා වන එමිල් ඩාර්ඩක් විසින්.
කෙසේවෙතත් මෙම ගැටුමෙන් පුද්ගලයින් 174දෙනෙකු මියගොස් ඇති බවටයි මීට පෙර විදෙස් මාධ්‍ය වාර්තා කර තිබුණේ.
අරේමා එෆ් සී සහ පර්සොබයා සුරාබයා යන කණ්ඩායම් දෙක අතර මෙම තරගය පවත්වා ඇති බවයි විදෙස් මාධ්‍ය වාර්තා කළේ. තරගය අවසන් බවට විනිසුරු සංඥා කිරීමෙන් පසු ප්‍රේක්ෂකයින් 3000ක පමණ පිරිසක් ක්‍රීඩා පිටිය තුළට කඩා වැදී තිබෙනවා.
තත්ත්වය පාලනය කිරීම සදහා පොලීසිය විසින් කදුළු ගෑස් ප්‍රහාරයක් එල්ල කර ඇති බවයි විදෙස් මාධ්‍ය අනාවරණ කළේ. ඒ සමග කලබලයට පත් ප්‍රේක්ෂකයින් ක්‍රීඩාංගනයෙන් පිටව යාමට උත්සාහ දැරීමේදී තෙරපීමට ලක්වීමෙන් සහ කදුළු ගෑස් හේතුවෙන් හුස්ම ගැනීමේ අපහසුතාවයන්ට පත්වීමෙන් මෙලෙස මියගොස් තිබෙනවා. සිද්ධියෙන් පුද්ගලයින් 180ක් පමණ පිරිසක් තුවාල ලබා ඇති බවයි විදෙස් මාධ්‍යවල වැඩිදුරටත් දැක්වෙන්නේ.
මෙම ක්‍රිඩාංගනයේ ප්‍රේක්ෂකයින්ගේ සම්පූර්ණ ධාරිතාව 38,000ක්. එහෙත් මෙම තරගයේ ටිකට් පත් 42,000ක් පමණ අලෙවි වී ඇති තිබෙනවා. ඒ අනුව එරට ප්‍රධාන ආරක්ෂක අමාත්‍යවරයා සදහන් කර ඇත්තේ මෙම ක්‍රීඩාංගනයේ ධාරිතාව ඉක්මවා වැඩිපුර ප්‍රේක්ෂකයින් 4000ක් පමණ සිට ඇති බවයි.
මේ අතර 1964 වර්ෂයේ පේරු රාජ්‍යයේ ලිමා හීදී ද පාපන්දු තරගයක් අතරතුර මෙවැනි කලහකාරී තත්ත්වයක් හටගෙන තිබෙනවා. එහිදී පුද්ගලයින් 320 දෙනෙකු මියගොස් ඇති අතර 1000ක පමණ පිරිසක් තුවාල ලබා තිබෙනවා. ඒ, පේරු සහ ආර්ජන්ටිනා යන කණ්ඩායම් අතර පේරු රාජ්‍යයේ ලිමා හීදී පැවති ඔලිම්පික් සුදුසුකම් ලැබීමේ තරගයකදීයි.
