සංචාරක ශ්‍රී ලංකා කණ්ඩායම සහ නවසීලන්ත කණ්ඩායම අතර පැවැත්වෙන 03 වන සහ අවසන් එක්දින ක්‍රිකට් තරඟය දැන් පැවැත්වෙනවා. ඒ, නවසීලන්තයේ හැමිල්ටන්හිදීයි.
මෙම තරඟය දිවා රාත්‍රී තරඟයක්. අද තරඟය ජයගතහොත් සීමිත පන්දුවාර එක්දින ලෝක කුසලානය සඳහා ඍජුව සුදුසුකම් ලැබීම පිළිබඳ සීමිත බලාපොරොත්තුවක් තබා ගැනීමට ශ්‍රී ලංකා පිලට හැකි වන බවයි ක්‍රීඩා මාධ්‍ය වාර්තා කළේ. ඒ සඳහා ශ්‍රී ලංකාවට ලැබෙන අවසන් අවස්ථාව ද මෙයයි.
දෙරට අතර පැවැති පළමු තරඟයෙන් නවසීලන්තය විශිෂ්ඨ ජයක් වාර්තා කළා. දෙවන තරඟය වර්ෂාව හේතුවෙන් අතහැර දැමුණා. ඒ අනුව අද තරඟය ජය ගතහොත් තරඟාවලිය සමකර ගැනීමට ශ්‍රී ලංකාවට අවස්ථාවක් පවතිනවා.
තරගයේ කාසිය වාසිය දිනූ ශ්‍රී ලංකා කණ්ඩායම පළමුවෙන් පන්දුවට පහරදීමට තීරණය කළා. පළමු තරඟයට ක්‍රීඩා කළ දිල්ෂාන් මධුෂංක වෙනුවට ධනංජය ද සිල්වා ශ්‍රී ලංකා කණ්ඩායමට කැඳවීමටයි තීරණය කර ඇත්තේ.
ශ්‍රී ලංකා කණ්ඩායම මේ වන විට පන්දුවාර 08ක් අවසානයේදී කඩුලු 03ක් දැවී ලකුණු 18ක් රැස් කරගෙන සිටිනවා.
