ඉන්දීය ප්‍රිමියර් ලීග් තරගාවලියේ ඊයේ පැවැති තරගයකින් ජය ගැනීමට රාජස්ථාන් රෝයල්ස් කණ්ඩායම සමත් වුණා. දිල්ලි කැපිටල්ස් කණ්ඩායම සමග පැවැති මෙම තරගය රාජස්ථාන් රෝයල්ස් කණ්ඩායම ජය ගත්තේ ලකුණු 57 කින්.
කාසියේ වාසිය දිනූ දිල්ලි කැපිටල්ස් කණ්ඩායම තීරණය කළේ පන්දු රැකීමටයි.
ඒ අනුව පළමුවෙන් පන්දුවට පහරදුන් රාජස්ථාන් රෝයල්ස් කණ්ඩායම නියමිත පන්දුවාර 20 අවසානයේ කඩුළු 04 ක් දැවී ලකුණු 199 ක් රැස් කළා. ජෝස් බට්ලර් ලකුණු 79 යි. යසස්වි ජයිෂ්වාල් පන්දු 31 කදී ලකුණු 60 ක් රැස් කළා. පන්දු යැවීමේදී මුකේෂ් කුමාර් ලකුණු 36 කට කඩුළු 02 ක් දවා ගත්තා.
පිළිතුරු ඉනිම ක්‍රීඩා කළ දිල්ලි කැපිටල්ස් කණ්ඩායමට නියමිත පන්දුවාර 20 අවසානයේ කඩුළු 09 ක් දැවී රැස්කර ගැනීමට හැකිවූයේ ලකුණු 142 ක් පමණයි. ඩේවිඩ් වෝනර් ලකුණු 65 යි. පන්දු යැවීමේදී යුෂ්වෙන්ද්‍ර චහාල් ලකුණු 27 කට කඩුළු 03 ක් දවා ගත් අතර ටේ‍රන්ට් බෝල්ට් ද ලකුණු 29 කට කඩුළු 03 ක් දවා ගත්තා. තරගයේ වීරයා ලෙස යසස්වි ජයිෂ්වාල් සම්මාන හිමි කර ගත්තා.
