රටට ආදරය කරන සැබෑ එක්සත් ජාතික පාක්ෂිකයෙක් නම් තමන්ට සහාය දෙන්නැයි එම පාක්ෂිකයින්ට ජනාධිපති රනිල් වික්‍රමසිංහ මහතා අද ඇරයුම් කළා.
බණ්ඩාරවෙල පැවති “පුළුවන් ශ්‍රී ලංකා” ජන රැළියට එක්වෙමින් ජනාධිපතිවරයා පැවසුවේ ලබන වසරේ ස්වයං රැකියා ලක්ෂයක් බිහිකරන බවයි.
හඳුනාගත් ක්ෂේත්‍ර කිහිපයක් සඳහා ඉන්ධන සහනාධාර ලබාදෙන බව සමගි ජන බලවේගයේ ජනාධිපති අපේක්ෂක, විපක්ෂ නායක සජිත් ප්‍රේමදාස මහතා පවසනවා.
එමෙන්ම සිය රජයක් යටතේ විශ්‍රාමිකයන්ගේ වැටුප් ගැටලුවට විසඳුම් ලබාදෙන බවයි මැදවච්චිය ප්‍රදේශයේ පැවති ජන හමුවකට එක්වෙමින් විපක්ෂ නායකවරයා පැවසුවේ.
සිය රජයේ ආරම්භ අවධියේ සිට ජනතාව වෙනුවෙන් ශක්තිමත් සහන පැකේජයක් ක්‍රියාත්මක කරන බව ජාතික ජන බලවේගයේ ජනාධිපති අපේක්ෂක, පාර්ලිමේන්තු මන්ත්‍රී අනුර කුමාර දිසානායක පවසනවා.
එම සහන පැකේජය ක්‍රියාත්මක කරන අතරතුර ක්‍රමානුකූලව රටේ ආර්ථිකය ශක්තිමත් කරන බවයි මන්ත්‍රීවරයා කියා සිටියේ.
ඒ, බියගම ප්‍රදේශයේ පැවති ජන හමුවකට එක්වෙමින්.
කෙසේවෙතත් දූෂිත දේශපාලනය පෝෂණ්‍ය කරන අපේක්ෂකයින් කිහිප දෙනෙක් ප්‍රධාන ධාරාවෙන් ජනාධිපතිවරණයට ඉදිරිපත්ව සිටින බව සර්වජන බලය ජනාධිපති ධූර අපේක්ෂක දිලිත් ජයවීර පවසනවා.
සර්වජන බලය ජනාධිපතිවරණ උපාය මාර්ග සැලැස්ම ජනගත කිරීම සඳහා කොළඹ පැවති උත්සවයකට එක්වෙමින් ඔහු මෙම අදහස් පල කළා.
ප්‍රධාන ජනපති අපේක්ෂකයින් ඉදිරිපත් කළ ප්‍රතිපත්ති ප්‍රකාශවලට එහා ගිය වැඩපිළිවෙලක් ඇතුළත් ප්‍රතිපත්ති ප්‍රකාශයක් ඉදිරිපත් කරන බව ශ්‍රී ලංකා පොදුජන පෙරමුණේ ජනාධිපති අපේක්ෂක පාර්ලිමේන්තු මන්ත්‍රී නාමල් රාජපක්ෂ පවසනවා.
ශ්‍රී ලංකා පොදුජන පෙරමුණ ප්‍රධාන පක්ෂ කාර්යාලයේ පැවති සාකච්ඡාවකින් අනතුරුව මාධ්‍ය හමුවේ අදහස් දක්වමින් මන්ත්‍රීවරයා මෙම අදහස් පල කළා.
ශ්‍රී ලංකා නිදහස් පක්ෂ ආණ්ඩුවක් බිහි කිරීමට දූෂණයෙන් තොර පාක්ෂිකයන් තමන් සමඟ සිටින බව ජනාධිපති අපේක්ෂක පාර්ලිමේන්තු මන්ත්‍රී විජයදාස රාජපක්ෂ පවසනවා.
එමෙන්ම ඇතැමුන් එල්ල කරන චෝදනාවලට ද මන්ත්‍රීවරයා කොළඹදී මාධ්‍ය හමුවේ අදහස් දැක්වුවා.
