මාතර, නාවිමන, රුවන්වැල්ල ප්‍රදේශයේදී පසුගිය 15 වනදා පුද්ගලයෙකු වෙඩි තබා ඝාතනය කිරීමේ සිද්ධියට සම්බන්ධ සැකකරුවන් දෙදෙනෙකු පොලිස් විශේෂ කාර්ය බලකාය විසින් අත්අඩංගුවට ගෙන තිබෙනවා.
ඉන් එක් සැකකරුවෙකු කැකණදුර ප්‍රදේශයේ පදිංචිකරුවෙකු බවයි පොලිසිය පැවසුවේ.
ඔහු අදාළ වෙඩි තැබීම සිදු කිරීම සඳහා මාර්ගය නිරීක්ෂනය කරමින් තොරතුරු ලබාදී තිබෙනවා. සැකකරු අත්අඩංගුවට ගෙන ඇත්තේ කැකණදුර - වෙහෙරහේන මාර්ගයේදීයි.
අදාළ වෙඩි තැබීම සිදු කිරීම සඳහා රථය පැදවූ සැකකරු ද අත්අඩංගුවට ගෙන තිබෙනවා.
ඔහු මාතර, තොටමුණ ප්‍රදේශයේ පදිංචිකරුවෙක්.
සැකකරුවන් අත්අඩංගුවට ගෙන ඇත්තේ පොලිස් විශේෂ කාර්ය බලකායේ දකුණු පළාත් විශේෂ මෙහෙයුම් ඒකකයේ නිලධාරීන්ට ලද තොරතුරකට අනුවයි.
සැකකරුවන් දෙදෙනා වැඩිදුර විමර්ශන සඳහා මාතර පොලිස් ස්ථානය වෙත භාරදී තිබෙනවා.
