රක්ෂිත බන්ධනාගාර ගත කළ යෝෂිත රාජපක්ෂ අධිකරණය හමුවට අද යළි ඉදිරිපත් කිරීමට නියමිතයි.
රත්මලාන ප්‍රදේශයේ නිවසක් සහිත ඉඩමක් මිලදී ගැනීමේ සිද්ධියකට අදාලව පසුගිය සෙනසුරාදා අපරාධ පරීක්ෂණ දෙපාර්තමේන්තුවේ නිලධාරින් කණ්ඩායමක් විසින් ඔහු අත්අඩංගුවට ගනු ලැබුවා.
ඒ, බෙලිඅත්ත ප්‍රදේශයේදීයි.
යෝෂිත රාජපක්ෂ අපරාධ පරීක්ෂණ දෙපාර්තමේන්තුව වෙත රැගෙන ඒමෙන් අනතුරුව ඔහුගෙන් දීර්ඝ ලෙස ප්‍රකාශ සටහන් කර ගත් බවයි පොලිසිය පැවසුවේ.
ඉන් අනතුරුව අපරාධ පරීක්ෂණ දෙපාර්තමේන්තුවේ නිලධාරින් විසින් ඔහු කොළඹ අතිරේක මහේස්ත්‍රාත්වරියගේ නිල නිවස වෙත ඉදිරිපත් කළා.
එහිදී අතිරේක මහේස්ත්‍රාත්වරිය නියෝග කළේ යෝෂිත රාජපක්ෂ අද දිනය දක්වා රක්ෂිත බන්ධනාගාර ගත කරන ලෙසයි.
ඒ අනුව එතෙක් ඔහු කොළඹ රිමාන්ඩ් බන්ධනාගාරයේ රඳවනු ලැබූ බවයි බන්ධනාගාර දෙපාර්තමේන්තුව පැවසුවේ.
