ජනාධිපති මෛත‍්‍රීපාල සිරිසේන මහතාගේ නිල වෙබ් අඩවියට අනවසරයෙන් ඇතුළු වී එහි දත්ත වෙනස් කළ බවට අත්අඩංගුවට ගත් 17 හැවිරිදි සිසුවා ලබන සිකුරාදා තෙක් පරිවාස භාරයේ තැබීමට අද (30) නියෝග කෙරුණා.
එ් කොළඹ ප‍්‍රධාන මහේස්ත‍්‍රාත් ගිහාන් පිලපිටියගේ නියෝගයකට අනුවයි. මීට අමතරව අදාළ සිද්ධියට ආධාර අනුබල දුන් බවට අත්අඩංගුවට ගත් 27 හැවිරිදි අනෙක් පුද්ගලයා ලබන සිකුරාදා තෙක් රක්ෂිත බන්ධනාගාර ගත කිරීමටද මෙහිදි නියෝග කෙරුණා.
සැකකරුවන් අද අධිකරණයට ඉදිරිපත් කෙරුණේ අපරාධ පරීක්ෂණ දෙපාර්තමේන්තුව විසින්. කෙසේ වෙතත් එහිදී විත්තියේ නිතීඥවරුන් පැවසුවේ සැකකරුවන් සිදුකර ඇත්තේ වෙබ් අඩවියේ ඇති ආරක්ෂාව පිළිබඳ ජනාධිපතිවරයා දැනුවත් කිරීම බවයි.
එමෙන්ම රටේ දැනට පවතින ප‍්‍රශ්න පිළිබඳ ජනාධිපතිවරයා දැනුවත් කර එ් සම්බන්ධයෙන් අවධානය යොමු කිරීමද ඔවුන්ගේ අරමුණක් වූ බවයි නිතිඥවරුන් කියා සිටියේ. ඔවුන්ට කිසිඳු අපරාධමය චේතනාවක් නොතිබූ බවද විත්තියේ නීතිඥවරුන් වැඩිදුරටත් පැවසුවා.
