මෙවර ශ‍්‍රී පාද වන්දනා සමය අදින් ආරම්භ වනවා. පැල්මඩුල්ල ගල්පොත්තාවල ශ‍්‍රීපාද රජමහ විහාරස්ථානයේ සමන් දේවාලයේ තැන්පත් කර තිබූ සාධාතුක කරඬුව, සුමන සමන් දේව ප‍්‍රතිමාව සහ දේවාභරණ ශ‍්‍රීපාදස්ථානය වෙත ඊයේ (12) වැඩම කරනු ලැබුවා. ඒ, විශේෂිත වූ පෙරහැර 03කින්.
සධාතුක කරඬුව, දේව ප‍්‍රතිමාව සහ දේවාභරණ රැගත් පෙරහැර ශ‍්‍රීපාද මළුව වෙත අද අලුයම ළඟා වූ බවයි එහි සිටින නෙත් නිවුස් වාර්තාකරු සඳහන් කළේ.
මෙවර ශ‍්‍රීපාද වන්දනා සමයේ දී පරිසරය ආරක්ෂා කිරීමේ අරමුණින් පොලිතීන් භාවිතය සම්පූර්ණයෙන්ම තහනම් කර තිබෙනවා.
වන්දනාකරුවන් විසින් රැගෙන එනු ලබන පොලිතීන් මස්කෙළිය මාවුස්සාකැලේ මාර්ග බාධකයේ සිට ශ‍්‍රීපාද උඩමළුව දක්වා ස්ථාන කිහිපයක දී පොලිසිය සහ මහජන පරීක්ෂකවරුන් සිය භාරයට ගැනීමටයි කටයුතු යොදා ඇත්තේ. ඒ වෙනුවට දිරාපත් වන විශේෂ බෑගයක් නොමිලේ ලබාදෙනු ඇති.
