කොළඹ ගංගාරාම විහාරස්ථානය, ජනාධිපති කාර්යාලය, අග්රාමාත්ය කාර්යාලය සහ සිංගප්පූරුවේ මහා කරුණා බෞද්ධ සංගමය එක්ව සංවිධානය කරන බුද්ධරශ්මි වෙසක් කලාපය මැයි 23,24,25 සහ 26 දිනවල ජනාධිපති කාර්යාලය, ෂැංග්රිලා හරිත භූමිය සහ ගංගාරාම විහාරස්ථානය කේන්ද්ර කර ගනිමින් පැවැත්වීමට නියමිතව තිබෙනවා.
“අත්තනො ව අවෙක්ඛෙය්ය කතානි අකතානි ච” (අනුන් කළ දේ නොව තමන් කළ දේ ගැන විමසිලිමත් වෙමු) යන තේමාව යටතේ සංවිධානය කර තිබෙන මෙම වෙසක් කලාපය මහා වෙසක් තොරණ, වෙසක් කූඩු ප්රදර්ශනය, බොදු බැති ගී, වෙසක් දන්සල්, තොවිල් සහ දෙවොල්මඩු, ශාන්තිකර්ම, මල් පෙරහර, සතිමත්භාවය වැඩසටහන, විරිදු ගායනා, විදුලි පහන් අලංකරණය සහ සංස්කෘතිකාංග රැසකින් සමන්විතය.
ජනාධිපති ලේකම් කාර්යාලය අසල බත් දන්සල සහ බිස්කට්, තේ පැන් දන්සල මැයි 23,24 සහ 25 යන දිනවල රාත්රී 7.00 සිට පැවැත් පැවැත්වීමට නියමිතයි.
බාලදක්ෂ මාවත හා බේරේ වැව ආශ්රිත බිම්තීරයේ “චුල්ල ධර්මපාල” ජාතකය නිරූපණය කරන වෙසක් තොරණ සහ දර්ශනීය පහන්කූඩු මැයි 23,24 සහ 25 යන තෙදින ප්රදර්ශනය කෙරෙන අතර මැයි 23 වනදා ප.ව 7.30ට ජනාධිපති රනිල් වික්රමසිංහ මහතා අතින් එය විවෘත කිරීමට නියමිතය.
මේ අතර ගංගාරාම විහාරස්ථානය ආශ්රිතව ඉදිවන “මඝ මානවක” ජාතකය නිරූපණය කරන වෙසක් තොරණ මැයි 23,24,25 සහ 26 දිනයන්හිදී ප්රදර්ශනය කිරීමට නියමිතයි.
තවද පාසල් දරුවන්, විශ්වවිද්යාල, ජාත්යන්තර පාසල්, තාක්ෂණ විද්යාල නියෝජනය කරමින් 500 දෙනෙකුගේ සහභාගීත්වයෙන් යුතුව පැවැත්වෙන “සතිමත් භාවය” පිළිබඳ වැඩසටහන හෙට (20) පෙ.ව 7.30ට කොළඹ, නිදහස් චතුරශ්රයේ දී පැවැත් වීමට කටයුතු යොදා තිබෙනවා.