ව්‍යාජ අංක තහඩු සවිකර තිබූ රුපියල් කෝටි හයක් පමණ වටිනා ඩිෆෙන්ඩර් හා ප්‍රාඩෝ වර්ගයේ මෝටර් රථයක් සහ අශ්ව බල 1000 යතුරු පැදියක් මහනුවර කොට්ඨාශ අපරාධ විමර්ශන කාර්යාංශය විසින් අත්අඩංගුවට ගෙන තිබෙනවා.
මධ්‍යම පළාත් ජ්‍යෙෂ්ඨ නියෝජ්‍ය පොලිස්පති ලලිත් පතිනායක මහතාට ලැබුණ තොරතුරකට අනුව අස්ගිරිය ප්‍රදේශයේ තිබී ඩිෆෙන්ඩර් රථය ද අකුරණ ප්‍රදේශයේ ව්‍යාපාරිකයෙකු සන්තකයේ තිබී ප්‍රාඩෝ රථ සහ අධිබල යතුරුපැදිය සොයා ගත් බව පොලීසිය පවසා සිටියේ.
මෙම වාහන වල අයිතිය තහවුරු කිරීම සඳහා ප්‍රමාණවත් ලියවිලි නොමැති වීම නිසා ඒවා පොලිස් භාරයට ගෙන සිදුකළ විමර්ශන වල දී අනාවරණය වී ඇත්තේ ඒවාහි අංක තහඩු ව්‍යාජ ඒවා බවයි.
මෙම ජීප් රථ සහ යතුරු පැදිය නීති විරෝධිව මෙරට ට ආනයනය කරන මෝටර් රථද නැතහොත් මෙරට දී එකලස් කරන ලද මෝටර් රථද නොඑසේ නම් සොරකම් කරන ලද ඒවාද යන්න සම්බන්ධයෙන් තහවුරු කර ගැනීමට පොලිසිය විමර්ශනයක් ආරම්භ කර තිබේ .
මෙම මෝටර් රථවල අයිතිකරුවන් ලෙස පෙනී සිටි පුද්ගලයින් මෙතෙක් අත්අඩංගුවට ගෙන නොමැති අතර මෙම වාහන මහනුවර පොලිසියේ රථ ගාලේ ගාල් කර තිබෙනවා
