කළුතර ගමගොඩ පාර, රජවත්ත ප්‍රදේශයේ නිවසකට පෙට්‍රල් බෝම්බ ප්‍රහාරයක් එල්ලකර සය හැවිරිදි පිරිමි දරුවෙකු ඝාතනය කිරීම සහ කාන්තාවකට බරපතල තුවාල සිදුකිරීමේ සිද්ධිය සම්බන්ධයෙන් පුද්ගලයන් දෙදෙනකු අත්අඩංගුවට ගෙන තිබෙනවා.
ඒ, කළුතර කොට්ඨාශ අපරාධ විමර්ශන ඒකකය මගින්.
එලෙස අත්අඩංගුවට ගෙන ඇත්තේ දොඩංගොඩ අක්කර 33 ප්‍රදේශයේ සහ සහ කළුතර කෝන්ගොඩ ප්‍රදේශයේ පදිංචි අවුරුදු 23 සහ 25 වයස්වල පසුවන පුද්ගලයන් දෙදෙනෙක්.
සැකකරුවන් ඉකුත් 29 වනදා රාත්‍රියේ කළුතර ගමගොඩ ප්‍රදේශයේ නිවසකට පෙට්‍රල් බෝම්බ ප්‍රහාරයක් එල්ලකර තිබුණා.
එහිදී කාන්තාවක් තුවාල ලැබූ අතර එම නිවසට රූපවාහිනිය නැරඹීමට පැමිණ සිටි පස් හැවිරිදි පිරිමි දරුවෙකු මියගොස් තිබුණා.
මත්කුඩු ජාවරමකට අදාළ මුදල් ගනුදෙනුවක් මත ලබාදුන් කොන්ත්‍රාත්තුවක් අනුව සැකකරුවන් තුවාල ලැබූ කන්තාව ඉලක්ක කරගනිමින් පෙට්‍රල් බෝම්බ ප්‍රහාරය එල්ලකර ඇති බවයි විමර්ශනවලදී අනාවරණ වී ඇත්තේ.
ප්‍රහාරයෙන් පිලිස්සුම් තුවාල ලැබූ දරුවාගේ විලාපය සමග සැකකරුවන් රැගෙන ආ අනෙක් බෝම්බය එල්ල නොකරම පලාගොස් ඇති බවයි පොලිසිය පැවසුවේ.
සැකකරුවන් ප්‍රහාරය සදහා භාවිතා කල යතුරුපැදිය, තවත් පෙට්‍රල් බෝම්බයක් සැදීමට භාවිතා කල දෑ සහ ජංගම දුරකථන දෙකක්ද සොයාගෙන තිබෙනවා.
කොන්ත්‍රාත්තුව වෙනුවෙන් සැකකරුවන්ට ලැබී ඇත්තේ රුපියල් 5000 ක මුදලක් බවටද සිදුකල වැඩිදුර විමර්ශන වලදී හෙලිව ඇති බව පොලීසිය පැවසුවා.
සැකකරුවන් කළුතර මහේස්ත්‍රාත් අධිකරණයට ඉදිරිපත් කිරිමට නියමිතයි.
සැකකරුවන් බෝම්බ ප්‍රහාරය එල්ල කිරීමට පෙර එම නිවස වෙත ගමන් ගන්නා ආකාරය මෙන්ම, පෙට්‍රල් මිලදී ගැනීම සඳහා කළුතර ප්‍රදේශයේ ඉන්ධන හලකට පැමිණෙන අයුරු දැක්වෙන සීසීටීවී දර්ශනද පොලීසිය විසින් සොයාගෙන තිබෙනවා.
