ගතවූ අප්‍රේල් මාසයේ ක්‍රිකට් පිටියේ දක්ෂතා දැක්වූ විශිෂ්ඨතම ක්‍රීඩකයින් තිදෙනා අතරට ශ්‍රී ලංකාවේ ප්‍රභාත් ජයසූරියගේ නම එක්වී තිබෙනවා.
ඒ, ජාත්‍යන්තර ක්‍රිකට් කවුන්සිලය මාසිකව සිදුකරන ක්‍රීඩක නාමයෝජනා ලැයිස්තුව ප්‍රකාශයට පත් කිරීමත් සමඟයි.
ප්‍රභාත් ජයසූරියගේ නම යෝජනාවී ඇත්තේ ටෙස්ට් ක්‍රිකට් කාණ්ඩයෙන්.
ඒ, අයර්ලන්තය සමඟ පැවති ටෙස්ට් තරඟාවලියේදී දැක්වූ දක්ෂතා සැලකිල්ලට ගෙනයි.
එහිදී ප්‍රභාත් ජයසූරිය නව ලෝක වාර්තාවක් ද බිහි කළා. ඒ, අඩුම තරඟ සංඛ්‍යාවකින් කඬුලු 50 ක් බිද හෙලූ ටෙස්ට් දඟ පන්දු යවන්නා බවට පත් වෙමින්.
එය වසර 71 ක් පැරණි ටෙස්ට් ක්‍රිකට් වාර්තාවක් වීම විශේෂත්වයක්. ටෙස්ට් තරඟ පිටියේ සියලු පන්දු යවන්නන් සැලකීමේදී අඩුම තරඟ සංඛ්‍යාවකින් කඬුලු 50 ක් බිඳ හෙලූ දෙවන ක්‍රීඩකයා ලෙස සම තැනට පත්වීමට ද ප්‍රභාත් ජයසූරියට හැකි වුණා.
ඔහු එම ලෝක වාර්තාව බිහි කළේ තරඟ 07 ක් තුළ කඬුලු 50 ක් බිඳ හෙළමින්. ඉන් කඬුලු 17 ක්ම ඔහු බිඳ හෙලා ඇත්තේ ඉකුත් අයර්ලන්ත ටෙස්ට් තරඟ දෙකේදීයි.
ඔහු මෙතෙක් සහභාගී වූ ටෙස්ට් තරඟ 7 න් ටෙස්ට් තරඟ 6 කදීම කඬුලු 5කට වැඩියෙන් දවාගෙන තිබීමද විශේෂත්වයක්.
අප්‍රේල් මාසයේ විශිෂ්ඨතම ක්‍රීඩකයින් තිදෙනාගේ නාම යෝජනා අතරට පාකිස්තානයේ ෆකර් සමාන් එක්දින ක්‍රිකට් කාණ්ඩයෙන්ද, නවසීලන්තයේ මාර්ක් චැක්මන් පන්දුවාර 20 කාණ්ඩයෙන් ද නිර්දේශවී තිබෙනවා.
