ප්‍රධාන බලවතුන් හත්දෙනාගේ කණ්ඩායම හෙවත් ජී7 කණ්ඩායමේ ආරක්ෂක අමාත්‍යවරුන් ඉතාලියේ නේපල්ස් හි පැවති ඔවුන්ගේ පළමු ආරක්ෂක අමාත්‍යවරුන්ගේ රැස්වීමට සහභාගී තිබෙනවා.
එහිදී තායිවානය වටා චීනයේ මෑත කාලීන දැවැන්ත යුද අභ්‍යාස පිළිබඳව ඔවුන්ගේ දැඩි අවධානය යොමු කර ඇති අතර චීනයේ ක්‍රියාකලාපය සම්බන්ධයෙන් කනස්සල්ල පළ කර තිබෙනවා.
ඉකුත් සෙනසුරාදා පැවැති එම හමුවේදී ජී7 කණ්ඩායමේ ආරක්ෂක අමාත්‍යවරුන් පවසා ඇත්තේ චීනය ඉකුත් සඳුදා තායිවානය වටා පවත්වන ලද යුද අභ්‍යාසය ප්‍රකෝපකාරී ක්‍රියාවක් බවයි.
"තායිවාන් සමුද්‍ර සන්ධිය හරහා සාමය සහ ස්ථාවරත්වය පවත්වා ගැනීම ජාත්‍යන්තර ආරක්‍ෂාව සහ සෞභාග්‍ය සඳහා අත්‍යවශ්‍ය බව නැවත තහවුරු කරන බව ද ඔවුන් පවසා තිබෙනවා.
නැඟෙනහිර සහ දකුණු චීන මුහුදේ තත්ත්වය පිළිබඳව ඔවුන්ගේ “බරපතල කනස්සල්ල” ප්‍රකාශ කිරීමෙන් පසුව, අමාත්‍යවරු “චීනයේ නාවික නිදහසට නැවත නැවතත් බාධා කිරීම, මතභේදාත්මක ලක්ෂණ මිලිටරිකරණය කිරීම සහ බලහත්කාර සහ බිය ගැන්වීමේ ක්‍රියාකාරකම්වලට දැඩි ලෙස විරුද්ධ වන” බව ද පැවසුවා.
බ්‍රිතාන්‍යය, කැනඩාව, ප්‍රංශය, ජර්මනිය, ඉතාලිය, ජපානය, අමෙරිකාව සහ යුරෝපා සංගමයේ නිලධාරීන් කලාපීය අභ්‍යාස සඳහා G-7 සහභාගීත්වය පුළුල් කිරීමට සහ ඉන්දු-පැසිෆික් කලාපය ස්ථාවර කිරීම සඳහා මෙහෙයුම් සහයෝගීතාව ගැඹුරු කිරීමට ඔවුන්ගේ අභිප්‍රාය තහවුරු කර තිබෙනවා.
ආරක්ෂක නිෂ්පාදනයේ පදනම ශක්තිමත් කිරීම සඳහා එක්ව කටයුතු කිරීමට ද ඔවුහු එකඟ වූ බවයි වාර්තා වන්නේ.
