සරසවි සිදු විරෝධතා පාගමනට කඳුළු ගෑස් ප්‍රහාර සහ ජල ප්‍රහාර එල්ල කිරීමට පොලිසිය පියවර ගත්තා.
පාගමන ශ්‍රී ජයවර්ධනපුර කෝට්ටේ පිහිටි පාර්ලිමේන්තුව දෙසට ගමන් කිරීමට උත්සහ ගැනීමේදී එය මැඩපැවැත්වීම සඳහා පොලිසිය මෙසේ ජල සහ කදුළු ගෑස් ප්‍රහාර එල්ල කර තිබෙනවා.
පාගමන නිසා කොළඹ රථවාහන තදබදය දැඩි වෙයි
(Nov 29, 2016 @ 16:20)
අන්තර් විශ්ව විද්‍යාලයීය ශිෂ්‍ය බලමණ්ඩලයේ විරෝධතා පා ගමනක් හේතුවෙන් බෞද්ධාලෝක මාවත, බොරැල්ල, රාජගිරිය සහ ඒ අවට මාර්ගවල මේ වන විට දැඩි රථවාහන තදබදයක් පවතිනවා.
අදාළ පාගමන පාර්ලිමේන්තුව දෙසට ගමන් කරනු ඇති බවයි වාර්තා වන්නේ.
මේ අතර නිවේදනයක් නිකුත් කරමින් පොලිස් මාධ්‍ය කොට්ඨාසය පැවසුවේ පවතින රථවාහන තදබදය හේතුවෙන් රියදුරන් හැකිතාක් විකල්ප මාර්ග භාවිත කළ යුතු බවයි.
විරෝධතාවය හේතුවෙන් පාර්ලිමේන්තු මාර්ගය පොල්දූව පාලම අසළින් වසා දැමීමටද පොලිසිය කටයුතු කර තිබෙනවා.
දෙපිරිසක් නිසා කොළඹ තදබදයක්
(Nov 29, 2016 @ 14:49)
මාලඹේ පෞද්ගලික විශ්ව විද්‍යාලය අහෝසි කරන ලෙස ඉල්ලමින් අන්තර් විශ්ව විද්‍යාල ශිෂ්‍ය බල මණ්ඩලය කැලණිය විශ්ව විද්‍යාලයෙන් පාගමනක් ආරම්භ කර තිබෙනවා.
ඔවුන් කොළඹ කොටුව හරහා විශ්වවිද්‍යාල ප්‍රතිපාදන කොමිසමට පැමිණීමටයි සැළසුම් කර ඇත්තේ.
පාගමන හේතුවෙන් කොළඹ – නුවර මාර්ගයේ එක් මංතීරුවක වාහන ගමනය සම්පූර්ණයෙන්ම ඇණහිට ඇති බවයි වාර්තා වෙන්නේ. ඒ හේතුවෙන් මාර්ගයේ දැඩි වාහන තදබදයක්ද ඇතිව තිබෙනවා.
මේ අතර සමෘද්ධි නිලධාරීන් පිරිසක් පවත්වන විරෝධතාවක් හේතුවෙන් පාර්ලිමේන්තු වටරවුම හා බත්තරමුල්ල ආශ්‍රිතව දැඩි වාහන තදබදයක් ඇතිව තිබෙනවා.
පොලීසිය පවසන්නේ රියදුරන්ට විකල්ප මාර්ග භාවිත කරන ලෙසයි.
(අන්තර් විශ්ව විද්‍යාලයීය ශිෂ්‍ය බල මණ්ඩලයේ කැඳවුම්කරු ලහිරු වීරසේකරගේ ෆේස්බුක් පිටුවේ පළ කර තිබූ මෙම ඡායාරූපය නම් කර ඇත්තේ “නෑමට පෙර ලහිරු සහ ලහිරු” ලෙසයි.)
