දකුණු අප‍්‍රිකානු වයස අවුරුදු 19 න් පහළ කණ්ඩායම සමග පැවති තරග 3 කින් යුත් එක්දින ක‍්‍රිකට් තරගාවලිය තරග දෙකට එකක් ලෙස ජයගැනීමට ශ්රී ලංකා වයස අවුරුදු 19 න් පහළ කණ්ඩායම සමත් වුණා.
ඒ, තුන්වන සහ අවසන් තරගය කඩුලු 6 කින් ජයගනිමින්. කොළඹ එස්.එස්.සී. ක‍්‍රීඩාංගණයේදී අද (13) මෙම තරගය පැවැත්වුණා.
පළමුවෙන් පන්දුවට පහරදුන් දකුණු අප‍්‍රිකානු වයස අවුරුදු 19 න් පහළ කණ්ඩායම නියමිත පන්දුවාර 50 දී කඩුලු 9 ක් දැවී ලකුණු 195 ක් රැස් කළා. ශ්රී ලංකා වයස අවුරුදු 19 න් පහළ කණ්ඩායම කඩුලු 4 ක් පමණක් දැවී පන්දුවාර 45 යි පන්දු 5 කදී ලකුණු 199 ක් ලබා ගත්තා.
