හිටපු ශ්‍රී ලංකා නායක මහේල ජයවර්ධන 2022 ජනවාරි 1 වන දින සිට ක්‍රියාත්මක වන පරිදි ජාතික කණ්ඩායම් සඳහා ‘උපදේශක පුහුණුකරු’ ලෙස පත් කර ඇති බව ශ්‍රී ලංකා ක්‍රිකට් ආයතනය නිවේදනය කර සිටිනවා.
වසරක කාලයක් සඳහා බලපැවැත්වෙන අතර නව භූමිකාව තුළ ජාතික කණ්ඩායමේ සමස්ත ක්‍රිකට් අංගය භාරව කටයුතු කරනු ලැබේ. කණ්ඩායමේ ඉහළ කාර්ය සාධන මධ්‍යස්ථානයේ ක්‍රීඩකයින්ට සහ කළමනාකරණ කණ්ඩායම් සඳහා උපාය මාර්ගික සහය ලබා දීමේ වගකීමද මහේල ජයවර්ධන සතු බවයි ශ්‍රී ලංකා ක්‍රිකට් ආයතනය නිවේදනය කර සිටින්නේ.
‛‛2022 වසර තුළ ශ්‍රී ලංකා ක්‍රිකට් කණ්ඩායමට අවිවේකි තරග කාල සටහනක් අනුව කටයුතු කිරීමට සිදුවන අතර එය සැලකිල්ලට ගනිමින්, මහේල දීර්ඝ කාර්යභාරයක් සඳහා ජාතික කණ්ඩායමට එක්වීම ගැන අපි අතිශයින් සතුටට පත්වෙනවා” යැයි ශ්‍රී ලංකා ක්‍රිකට් ප්‍රධාන විධායක නිලධාරී ඈෂ්ලි ද සිල්වා සඳහන් කර සිටියේ.
“ICC පිරිමි T20 ලෝක කුසලානයේ පළමු වටයේදී මහේලගේ දායකත්වය අවසන් වූ ඉසව්වේ අපගේ කණ්ඩායමේ සමස්ත දස්කම් සඳහා මිල කළ නොහැකි විය,” ද සිල්වා වැඩිදුරටත් පැවසීය.
නව පත්වීමට අමතරව, මහේල ජයවර්ධන ලබන වසරේ බටහිර ඉන්දීය කොදෙව්හි පැවැත්වීමට නියමිත වයස අවුරුදු 19 න් පහළ ලෝක කුසලානය සඳහා සූදානම් වන බැවින්, වයස අවුරුදු 19 න් පහළ කණ්ඩායම සමඟ ඔහුගේ කාර්යභාරය දිගටම ඉටු කරනු ඇත.
“ශ්‍රී ලංකාවේ දැවැන්ත ක්‍රිකට් දක්‍ෂතා සහ හැකියාවන්ට සාධාරණය ඉටු කිරීමට අපට උපකාර කිරීම සඳහා 19 න් පහළ සහ A කණ්ඩායම් ඇතුළු අපගේ විවිධ සංවර්ධන සංචිතවල සිටින ජාතික ක්‍රිකට් ක්‍රීඩකයින් සහ පුහුණුකරුවන් සමඟ වැඩ කිරීමට මෙය උද්යෝගිමත් අවස්ථාවක්,” බවයි නා පත්වීම ගැන අදහස් දක්වමින් මහේල ජයවර්ධන පැවසුවේ.
