එල් පී එල් ක්‍රිකට් තරගාවලියේ තවත් තරග 02 ක් අද පැවැත්වෙනවා. අද පස්වරු 03 ට ආරම්භ වන පළමු තරගයේදි දඹුල්ල ඕරා කණ්ඩායම සමග කැන්ඩි ෆැල්කන්ස් කණ්ඩායම තරග වැදිමට නියමිතයි.
ගෝල් ග්ලැඩියේටර්ස් කණ්ඩායම සහ කලම්බු ස්ටාර්ස් කණ්ඩායම අතර තරගය රාත්‍රි 07 යි 30 ට ආරම්භ වමට නියමිතව තිබෙනවා. එම තරග 02 ම පල්ලෙකැලේ ජාත්‍යන්තර ක්‍රිකට් ක්‍රිඩාංගනයේදි පැවැත්වෙනවා.
මේ අතර මෙම තරගාවලියේ ඊයේ රාත්‍රියේ පැවැති තරගයකින් තියුණු ජයක් අත්කර ගැනීමට ජැෆ්නා කිංග්ස් කණ්ඩායම සමත්වුණා. ඒ, කලම්බු ස්ටාර්ස් කණ්ඩායම ලකුණු 06 කින් පරාජය කරමින්.
මෙම තරගයේ පළමුව පන්දුවට පහරදුන් ජැෆ්නා කිංග්ස් කණ්ඩායම නියමිත පන්දුවාර 20 තුළ කඩුළු 05 ක් දැවී ලකුණු 178 ක් රැස් කිරීමට සමත්වුණා. ෂොයිබ් මලික් පන්දු 26 කදී නොදැවී ලකුණු 35 යි. සදීර සමරවික්‍රම පන්දු 25 කදී ලකුණු 32 ක් රැස් කළා.
පිළිතුරු ඉනිම ක්‍රීඩා කළ කලම්බු ස්ටාර්ස් කණ්ඩායමට නියමිත පන්දුවාර 20 තුළ කඩුළු 08 ක් දැවී ලබාගත හැකි වූයේ ලකුණු 172 ක් පමණයි. නායක ඇන්ජලෝ මැතිව්ස් පන්දු 38 කදී නොදැවී ලකුණු 73 ක් රැස් කළ ද එය තරගයේ ජයග්‍රහණයට ප්‍රමාණවත් වූයේ නැහැ. මැතිව්ස්ගේ ඉනිමට හතරේ පහර 08 ක් සහ හයේ පහර 03 ක් ඇතුළත් වුණා. බෙනී හොවෙල් පන්දු 20 කදි ලකුණු 43 ක් රැස් කළා.
